रायगड | क्रीडा प्रतिनिधी
महाराष्ट्र क्रिकेट असोसिएशनच्या (MCA) वतीने आयोजित करण्यात येणाऱ्या प्रौढ गटातील (Senior Category) क्रिकेट सामन्यांचे यजमानपद यंदा रायगड जिल्ह्याला मिळाले आहे. रायगड जिल्हा क्रिकेट असोसिएशनच्या (RDCA) पुढाकाराने जिल्ह्यातील विविध चार मैदानांवर हे सामने खेळवले जाणार असून, हे सर्व सामने ‘दोन दिवसीय कसोटी’ फॉरमॅटमध्ये होतील.
जिल्ह्यातील ‘या’ मैदानांवर होणार आयोजन स्पर्धेचे गांभीर्य आणि दर्जा लक्षात घेऊन रायगडमधील दर्जेदार मैदानांची निवड करण्यात आली आहे. यात प्रामुख्याने:
पेण: नगरपालिकेचे छत्रपती शिवाजी महाराज क्रिकेट मैदान.
नागोठणे: रिलायन्स क्रिकेट मैदान.
रसायनी (पाताळगंगा): नॅशनल इन्स्टिट्यूट ऑफ सिक्युरिटी मार्केट्स (NISM) मैदान.
गव्हाण-उलवे: छत्रपती शिवाजी महाराज मैदान.
‘ग्रुप डी’मध्ये रंगतदार लढती या स्पर्धेतील ‘ग्रुप डी’मध्ये एकूण सहा संघांचा समावेश असून त्यांच्यात साखळी फेरीतील १५ सामने रंगणार आहेत. यात यजमान रायगड जिल्हा क्रिकेट असोसिएशनसह नाशिक जिल्हा क्रिकेट असोसिएशन, वायएमसीए क्रिकेट क्लब, सीडीए क्रिकेट क्लब (पुणे), सीओएम क्रिकेट क्लब (पुणे) आणि सेंट्रल झोन या तगड्या संघांचा समावेश आहे. विशेष म्हणजे, या सामन्यांसाठी एमसीए प्रमाणित स्थानिक पंच आणि गुणलेखक सामना अधिकारी म्हणून जबाबदारी पार पाडणार आहेत.
“रायगडमध्ये या स्तरावरील सामन्यांचे आयोजन होणे ही जिल्ह्यासाठी अभिमानाची गोष्ट आहे. सर्व पदाधिकारी आणि सदस्य हे सामने यशस्वी करण्यासाठी मेहनत घेत आहेत.”
— अनिरुद्ध पाटील (अध्यक्ष) व प्रदीप नाईक (सचिव), RDCA
रायगडमधील जास्तीत जास्त युवा खेळाडूंनी आणि क्रिकेट प्रेमींनी या दर्जेदार सामन्यांचा आनंद घेण्यासाठी मैदानावर उपस्थित राहावे, असे आवाहन रायगड जिल्हा क्रिकेट असोसिएशनतर्फे करण्यात आले आहे.