रायगड | क्रीडा प्रतिनिधी
महाराष्ट्र क्रिकेट असोसिएशनच्या (MCA) वतीने आयोजित वरिष्ठ गट पुरुष क्रिकेट स्पर्धेतील ‘ग्रुप डी’च्या सामन्यांना रायगड जिल्ह्यात उत्साहात सुरुवात झाली आहे. पहिल्या फेरीच्या अखेरीस नाशिक जिल्हा क्रिकेट असोसिएशन, क्लब ऑफ महाराष्ट्र आणि वायएमसीए क्रिकेट क्लब पुणे या संघांनी आपापल्या सामन्यात विजय नोंदवत स्पर्धेत विजयी सलामी दिली आहे.
रायगडला ‘स्लो ओव्हर रेट’चा फटका; नाशिकचा विजय
रिलायन्स क्रिकेट ग्राउंड, नागोठणे येथे झालेल्या रायगड विरुद्ध नाशिक सामन्यात यजमान रायगडला शिस्तीचा मोठा फटका बसला. रायगडच्या संघाने संथ गतीने गोलंदाजी केल्यामुळे त्यांना २८ धावांची पेनल्टी आकारण्यात आली.
- नाशिक (पहिला डाव): १६८ धावा + २८ (पेनल्टी) = १९६ धावा.
- रायगड (पहिला डाव): सर्वबाद १९० धावा.
- नाशिक (दुसरा डाव): सर्वबाद २२७ धावा.
- रायगड (दुसरा डाव): ८ बाद १५० धावा (खेळ संपेपर्यंत).
सामना अनिर्णित राहिला असला तरी, पहिल्या डावातील ६ धावांच्या महत्त्वपूर्ण आघाडीमुळे (पेनल्टीसह) नाशिकच्या संघास विजयी घोषित करण्यात आले.
इतर सामन्यांचा निकाल
क्लब ऑफ महाराष्ट्र वि. सेंट्रल झोन: क्लब ऑफ महाराष्ट्रने हा सामना एक डाव आणि ६३ धावांनी खिशात टाकला.
वायएमसीए पुणे वि. सेंट्रल डिफेन्स अकॅडमी: वायएमसीए पुणे संघाने ७८ धावांनी शानदार विजय मिळवला.
या स्पर्धेतील सामने गव्हाण (उलवे) येथील छत्रपती शिवाजी महाराज मैदान, रसायनी (पाताळगंगा) येथील एनआयएसएम मैदान आणि नागोठणे येथील रिलायन्स ग्राउंडवर खेळवले जात आहेत. रायगड जिल्हा क्रिकेट असोसिएशनचे अध्यक्ष अनिरुद्ध पाटील आणि सचिव प्रदीप नाईक यांच्या मार्गदर्शनाखाली सर्व पदाधिकारी स्पर्धा यशस्वी करण्यासाठी परिश्रम घेत आहेत.
स्पर्धेतील दुसरी साखळी फेरी उद्या, १९ फेब्रुवारी पासून सुरू होणार आहे.