उरण (विशेष बातमीदार): जवाहरलाल नेहरू पोर्ट प्राधिकरणात (JNPA) ‘रिकामा’ (EMPTY) स्टेटस दाखवून नामांतरीत करणाऱ्या एका संशयास्पद कंटेनरवर केंद्रीय औद्योगिक सुरक्षा दलाच्या (CISF) जवानांनी तातडीने कारवाई करत सुमारे ७२.४० लाख रुपये किमतीचा २४६ फ्रंट-लोड वॉशिंग मशीन्सचा साठा जप्त केला आहे. या कारवाईमुळे सागरी सुरक्षा यंत्रणांची सतर्कता पुन्हा एकदा अधोरेखित झाली आहे.
मिळालेल्या माहितीनुसार, ४ सप्टेंबर २०२६ रोजी JNPA गेटवर आलेल्या एका कंटेनरची कागदपत्रांवर ‘रिकामा’ (EMPTY) अशी नोंद करण्यात आली होती. मात्र, गेटवर तैनात असलेल्या CISF जवानांनी नियमित तपासणीदरम्यान संशय आल्याने कंटेनरची सखोल पाहणी केली. तेव्हा कंटेनर रिकामा नसून त्यात मोठ्या प्रमाणावर वस्तू भरलेल्या असल्याचे उघडकीस आले.
जवानांनी तात्काळ या घटनेची माहिती देऊन पुढील सखोल कायदेशीर चौकशीसाठी सदर कंटेनर कस्टम विभागाच्या स्वाधीन केला. कस्टम विभाग आणि टर्मिनल ऑपरेटरच्या कर्मचाऱ्यांनी संयुक्तपणे केलेल्या प्रत्यक्ष तपासणीत कंटेनरमधून एकूण २४६ उच्च दर्जाच्या फ्रंट-लोड वॉशिंग मशीन्स जप्त करण्यात आल्या. यामध्ये ६ किलो क्षमतेच्या १४७ मशीन्स आणि ८ किलो क्षमतेच्या ९९ मशीन्सचा समावेश आहे. जप्त करण्यात आलेल्या या मालाची एकूण अंदाजे किंमत ₹७२ लाख ४० हजार रुपये इतकी वर्तवण्यात आली आहे.
भारत सरकारने ‘इंटरनॅशनल शिप अँड पोर्ट फॅसिलिटी सिक्युरिटी’ (ISPS) कोडअंतर्गत भारतातील प्रमुख बंदर सुविधांच्या सुरक्षेसाठी CISF ला ‘मान्यताप्राप्त सुरक्षा संस्था’ (RSO) म्हणून अधिकृत केले आहे. सध्या CISF देशातील JNPA सह १३ महत्त्वाच्या बंदरांना चोख सुरक्षा कवच पुरवत आहे.
महत्त्वाच्या सागरी पायाभूत सुविधांचे संरक्षण, अवैध तस्करीला आळा आणि कार्गो स्क्रीनिंग मधील बहुस्तरीय सुरक्षा व्यवस्था किती प्रभावी आहे, हे या धडक कारवाईमुळे सिद्ध झाले आहे. कस्टम विभागाकडून सध्या या प्रकरणाची सखोल चौकशी सुरू असून संबंधित आयातदार आणि वाहतूकदारांवर नियमानुसार पुढील कडक कारवाई करण्यात येत आहे.