"आम्ही मान इकडे तिकडे केली असती तर त्यांची सीट गेली असती"; मंत्री भरत गोगावले यांनी सुनील तटकरेंना सुनावलं

रायगड : कोकणातील रत्नागिरी व रायगड जिल्ह्यातील उर्वरित तालुके दुष्काळग्रस्त घोषित करण्यासाठी मंत्रिमंडळात प्रस्ताव मांडणार असल्याची माहिती मंत्री भरत गोगावले यांनी दिली आहे. दरम्यान, खासदार सुनील तटकरे आणि आमदार महेंद्र थोरवे यांच्यातील वाद आमचे नेते उपमुख्यमंत्री एकनाथ शिंदे मिटवतील, अशी सावध प्रतिक्रिया त्यांनी व्यक्त केली. मात्र, मंत्री उदय सामंत यांनी केलेल्या "आम्हीच खासदार सुनील तटकरे यांना निवडून आणले" या विधानाची गोगावले यांनी पूर्ण पाठराखण करत तटकरे यांना अप्रत्यक्षरीत्या खडेबोल सुनावले आहेत.

उदय सामंत यांचे विधान अगदी योग्य: भरत गोगावले

मंत्री उदय सामंत यांच्या विधानावर बोलताना मंत्री भरत गोगावले म्हणाले की, "उदय सामंत जे बोलले, ते अगदी योग्यच आहे. महेंद्र थोरवे, महेंद्र दळवी, योगेश कदम आणि मी; आम्ही चौघे नसतो तर खासदार सुनील तटकरे निवडून आले नसते. आम्ही जरा जरी मान इकडे तिकडे हलवली असती, तरी रायगड लोकसभेची त्यांची एकमेव जागा हातातून गेली असती." त्यामुळे सामंत यांच्या वक्तव्यात कोणतीही चुकीची गोष्ट नसून त्यांनी वस्तुस्थिती मांडल्याचे गोगावले यांनी स्पष्ट केले.

दुष्काळी परिस्थितीवर मंत्रिमंडळात प्रस्ताव मांडणार

या राजकीय वादाच्या मुद्द्यासोबतच कोकणातील शेतकरी व नागरिकांच्या प्रश्नांवर बोलताना मंत्री गोगावले म्हणाले की, रत्नागिरी आणि रायगड जिल्ह्यातील जे तालुके अद्याप दुष्काळात समाविष्ट झालेले नाहीत, त्यांनाही दुष्काळग्रस्त घोषित करून शासनाचे सर्व लाभ मिळवून देण्यासाठी आगामी मंत्रिमंडळाच्या बैठकीत जोरदार प्रस्ताव मांडला जाईल, असे त्यांनी सांगितले.