मुंबई-गोवा कोकण रेल्वे मार्गावरील महाड तालुक्यातील करंजाडी रेल्वे स्थानक परिसरात रविवारी सायंकाळी एका सिमेंटच्या पोत्यात जिवंत वन्यजीव आढळल्याने खळबळ उडाली आहे. महाड येथील 'सिस्केप' (SEESCAPE) संस्थेच्या कार्यकर्त्यांनी घटनास्थळी धाव घेऊन पाहणी केली असता, पोत्यामध्ये अनुसूची-१ (Schedule 1) दर्जाचा पाच फूट लांबीचा जिवंत अजगर आढळून आला. या प्रकारामुळे रेल्वे मार्गावरून वन्यजीवांची तस्करी होत असल्याचा अथवा जादूटोण्यासाठी (ब्लॅक मॅजिक) त्यांचा वापर केला जात असल्याचा संशय वन्यजीवप्रेमींकडून व्यक्त केला जात आहे.
जाहिरात (Advertisement)
'सिस्केप'च्या वन्यजीव मित्रांची तत्परता
करंजाडी रेल्वे स्थानकावर एका प्लास्टिकच्या पोत्यात काहीतरी हालचाल होत असल्याची माहिती रेल्वे प्रशासकीय अधिकाऱ्यांनी 'सिस्केप' संस्थेला दिली. माहिती मिळताच रविवारी रात्री आठच्या सुमारास संस्थेचे शार्दुल वारंगे, योगेश गुरव व त्यांच्या अन्य चार सहकाऱ्यांनी करंजाडी रेल्वे स्थानकात धाव घेतली. रेल्वे अधिकाऱ्यांच्या परवानगीने स्थानक परिसरात शोध घेतला असता, रेल्वे ट्रॅकच्या बाजूला असलेल्या सिमेंटच्या गोणीत गाठ मारलेला ५ फूट लांबीचा अजगर निदर्शनास आला.
संस्थेच्या सदस्यांनी सुटका केलेल्या या अजगराला महाड वनविभागाच्या स्वाधीन करून त्याची वैद्यकीय तपासणी करण्याची प्रक्रिया सोमवारी सकाळी सुरू केली. दिवाळीच्या सणाची वेळ असतानाही रात्रीच्या वेळी तत्परता दाखवून अजगराची सुटका केल्याबद्दल स्थानिक नागरिक व पर्यावरणप्रेमींकडून 'सिस्केप' संस्थेचे कौतुक होत आहे.
तस्करी की जादूटोणा? चौकशीची मागणी
एकीकडे कोकण मार्गावर अवैध दारू वाहतुकीवर पोलीस कारवाई करत असतानाच, दुसरीकडे अत्यंत दुर्मिळ मानल्या जाणाऱ्या 'अनुसूची-१' दर्जाच्या अजगराची अशा प्रकारे वाहतूक होत असल्याचे समोर आल्याने अनेक गंभीर प्रश्न उपस्थित झाले आहेत. हा अजगर तस्करीसाठी आणला होता की जादूटोण्यासाठी? असा सवाल उपस्थित केला जात आहे. या प्रकाराची गांभीर्याने दखल घेऊन रेल्वे प्रशासन आणि वनविभागाने या मार्गावर विशेष खबरदारी बाळगावी, अशी मागणी परिसरातील ग्रामस्थांनी केली आहे. 
