मुंबई : ‘शोले’ हा चित्रपट प्रदर्शित होऊन आता जवळपास पाच दशके लोटली आहेत. हा चित्रपट न पाहिलेली व्यक्ती शोधूनही सापडणार नाही. चित्रपटातील कित्येक संवाद आजही चाहत्यांच्या मुखी आहेत. ‘शोले’चे हे गारूड आज अर्धशतकानंतरही कायम असल्याचे नुकतेच दिसून आले. चित्रपटातील गब्बरचा ‘कितने आदमी थे?’ हा प्रश्न शनिवारी कुलाबा येथील रिगल थिएटरमध्ये झालेल्या या चित्रपटाच्या विशेष स्क्रीनिंगवेळी विचारला असता, तर त्याचे उत्तर मिळाले असते, ‘हाऊसफुल्ल, सरदार!!’
भारतीय चित्रपटसृष्टीतील या अजरामर चित्रपटाने शनिवार, ३१ ऑगस्टला ‘रिगल’चा पडदा पन्नास वर्षांनी पुन्हा एकदा उजळला. फिल्म हेरिटेज फाउंडेशनतर्फे (एफएचएफ) ५० वर्षे जुन्या सिनेमास्कोप प्रिंटच्या खास शोचे निशुल्क आयोजन शनिवारी करण्यात आले होते. आबालवृद्ध रसिकांनी ‘शोले’ पाहण्यासाठी तुडुंब गर्दी केली. १५ ऑगस्ट १९९५ रोजी रमेश सिप्पी दिग्दर्शित आणि सलीम-जावेद लिखित ‘शोले’ प्रदर्शित झाला होता. प्रारंभी तीन दिवस प्रेक्षक चित्रपटाकडे फिरकले नव्हते. चित्रपट ‘फ्लॉप’ झाल्याच्या चर्चांनाही उधाण आले. मात्र, पुढच्या आठवड्यापासून प्रेक्षकांनी ‘शोले’ला अक्षरशः डोक्यावर घेतले आणि भारतीय चित्रपटांचा नवा इतिहास लिहिला गेला. शनिवारी, रिगलमध्ये पुन्हा ‘शोले’ झळकला आणि मुंबईकर रसिक आठवणींत रमले. या विशेष स्क्रीनिंगला मुंबईकरांचा भरभरून प्रतिसाद लाभला आणि ‘शोले’च्या या अमर कथेने पुन्हा एकदा प्रेक्षकांच्या हृदयाचा ठाव घेतला.
‘प्रोजेक्शनिस्ट म्हणून पन्नास वर्षांचा अनुभव असलेले मोहम्मद असलम फकीह यांनी या विशेष प्रिंटचे प्रोजेक्शन केले. सत्तरच्या दशकातील गाजलेल्या अनेक चित्रपटांचे पटकथालेखक सलीम-जावेद यांच्या सन्मानार्थ हे स्क्रीनिंग आयोजित करण्यात आले होते,’ असे एफएचएफचे संस्थापक शिवेंद्रसिंह डुंगरपूर यांनी सांगितले. एफएचएफ आर्काइव्हमध्ये जतन केलेल्या चित्रपटाच्या प्रिंटला स्क्रीनिंगची परवानगी दिल्याबद्दल त्यांनी शहजाद सिप्पी यांचेही आभार मानले.
‘सलीम-जावेद यांनी लिहिलेले चित्रपटातील संवाद अतिशय लोकप्रिय आहेत, ते कालातीत आहेत. कितीही वेळा ‘शोले’ पाहावा, पाहिलाय, पाहतोय… तोच रोमांच, तसाच थरार. ४९ वर्षांनंतरही ‘शोले’चे आकर्षण कायम राहिलेय. ‘रिगल’मध्ये श्रेयनामावलीपासूनच रसिकांचा मिळालेला उत्स्फूर्त प्रतिसाद जबरदस्त होता. अनेक दृश्ये व संवादांना आजही थिएटर डोक्यावर घेतले गेले. अद्भूत आणि अद्भुतच,’ अशी प्रतिक्रिया या विशेष खेळाला उपस्थित असलेले ज्येष्ठ चित्रपटसमीक्षक दिलीप ठाकूर यांनी व्यक्त केली.