अतिवृष्टीच्या पार्श्वभूमीवर रायगड जिल्ह्यातील शाळांना, महाविद्यालयांना सुट्टी

किरण लाड
नागोठणे : गेली दोन दिवस जिल्ह्यात मुसळदार पाऊस पडत असल्याने ठिकठिकाणी नदी, नाले, तलाव, ओढे पाण्याने तुडुंब भरून वाहत आहेत. बससेवा, वाहतूक व्यवस्था विस्कळीत झाली आहे. पुरपरिस्थीती निर्माण होऊन विद्यार्थ्यांचे येण्या, जाण्याचे मार्ग बंद होऊ शकतात या पार्श्वभूमीवर पुढची खबरदारी म्हणून तसेच संभाव्य धोके टाळण्यासाठी रायगड जिल्ह्याधिकारी डाॅ. योगेश म्हसे यांनी जिल्ह्यातील सर्व शाळा, महाविद्यालयांना सुट्टी जाहीर केली आहे.

भारतीय हवामान विभागाने रायगड जिल्ह्याला दि. 17 ते 21 जुलैपर्यंत अतिवृष्टीचा इशारा दिला आहे. त्या पार्श्वभूमीवर जिल्ह्यात गेली दोन दिवस मुसळधार पाऊस पडत आहे. नदी, नाले, ओढे, तलाव ओसांडुन वाहत आहेत. बससेवा, वाहतुक व्यवस्था विस्कळीत झाली आहे. गावातुन, वाड्यांतुन, डोंगरातुन शाळेत शिक्षणासाठी येणाऱ्या विद्यार्थ्यांचे तसेच शिक्षक वर्गांचे हाल होऊ नये तसेच पुढील संभाव्य परिस्थिती निर्माण होऊ नये यासाठी रायगड जिल्हाधिकारी यांनी शाळांना सुट्टी जाहीर केली आहे.