अमूलकुमार जैन
रायगड : महाराष्ट्र राज्य सहकारी बँक असोसिएशनतर्फे दिला जाणारा ‘राज्यातील बेस्ट सीईओ’ हा राज्यस्तरीय प्रतिष्ठेचा पुरस्कार रायगड जिल्हा सहकारी बँकेचे मुख्य कार्यकारी अधिकारी मंदार वर्तक यांना प्रदान करण्यात आला. मुंबई येथील यशवंतराव चव्हाण सेंटरमध्ये आयोजित कार्यक्रमात राज्याचे सहकार राज्यमंत्री डॉ. पंकज भोयर यांच्या हस्ते हा पुरस्कार प्रदान करण्यात आला. यावेळी कोकण विभागीय महसूल आयुक्त डॉ. विजय सूर्यवंशी, महाराष्ट्र बँक असोसिएशनचे पदाधिकारी, रायगड जिल्हा सहकारी बँकेचे अध्यक्ष जयंत पाटील आणि बँक असोसिएशनच्या संचालिका सुप्रिया पाटील उपस्थित होते.
मंदार वर्तक यांनी २०२२ साली रायगड जिल्हा सहकारी बँकेच्या मुख्य कार्यकारी अधिकारी पदाची सूत्रे स्वीकारल्यानंतर अल्पावधीतच बँकेच्या सर्वांगीण प्रगतीसाठी उल्लेखनीय कामगिरी बजावली. त्यांच्या कार्यकाळात बँकेने सहकारी क्षेत्रातील देशातील पहिले संगणकीकरण, ६५०० कोटी रुपयांचा व्यवसाय, तसेच आयएमपीएस, क्यूआर कोड सेवा, मोबाईल बँकिंग आणि इतर डिजिटल सेवा ग्रामीण ग्राहकांपर्यंत प्रभावीपणे पोहोचवल्या. पारंपरिक बँकिंग व्यवस्थेत आधुनिक संगणक प्रणाली, प्रशासकीय पारदर्शकता आणि सेवा सुधारणा यांचा प्रभावी समावेश करून बँकेला राज्यातील आघाडीच्या जिल्हा बँकांच्या पंक्तीत नेऊन बसवले.
बँकेने नाबार्ड, राज्य सहकारी बँक आणि सहकार विभाग यांनी ठरवलेल्या उद्दिष्टांपेक्षा अधिक चांगली कामगिरी करत राज्यभरात स्वतःचे वेगळे स्थान निर्माण केले आहे. सध्या बँकेच्या ६० पेक्षा अधिक शाखा आणि १७ एटीएमच्या माध्यमातून तळागाळातील गावकऱ्यांपर्यंत आर्थिक सेवा पोहोचवल्या जात आहेत. मंदार वर्तक यांच्या नेतृत्वाखाली सहकार, तंत्रज्ञान आणि सामाजिक बांधिलकी या त्रिसूत्रीवर आधारित धोरण प्रभावीपणे राबवले जात आहे.
या पुरस्कारानंतर व्यक्त केलेल्या मनोगतात मंदार वर्तक म्हणाले की, “बँकेचे अध्यक्ष जयंत पाटील यांची दूरदृष्टी, उपाध्यक्ष सुरेश खैरे यांची खंबीर साथ, संचालक मंडळाचे सुसंगत सहकार्य आणि माजी मुख्य कार्यकारी अधिकारी प्रदीप नाईक यांचे मार्गदर्शन या यशामागील प्रमुख घटक आहेत. याशिवाय बँकेतील अधिकारी-कर्मचारी आणि ग्राहक, हितचिंतक यांचे वेळोवेळी मिळालेले पाठबळ देखील बँकेच्या प्रगतीचा कणा ठरले आहे.” तसेच पुढील दोन वर्षांत बँक १०,००० कोटींच्या व्यवसायाचा टप्पा पार करेल, असा विश्वास त्यांनी व्यक्त केला.
या पुरस्कारामुळे रायगड जिल्हा सहकारी बँकेचा गौरव तर झाला आहेच, पण राज्यातील सहकारी बँकांसाठी एक नवा आदर्श आणि प्रेरणास्त्रोत निर्माण झाला आहे. मंदार वर्तक यांचे नेतृत्व राज्यातील सहकार चळवळीला नवी दिशा देणारे ठरेल, असा विश्वास संपूर्ण सहकार क्षेत्रातून व्यक्त केला जात आहे.