रायगड । क्रीडा प्रतिनिधी
रायगड जिल्हा क्रिकेट असोसिएशनच्या वतीने आयोजित करण्यात आलेल्या तेवीस वर्षांखालील मुलांच्या एकदिवसीय ४० षटकांच्या निवड चाचणी क्रिकेट स्पर्धेत रोशन क्रिकेट अकॅडमी, कामोठे संघाने अंतिम विजयी संघ होण्याचा मान मिळवला आहे. पेण येथील छत्रपती शिवाजी महाराज मैदानावर खेळविण्यात आलेल्या अतिशय अटीतटीच्या अंतिम सामन्यात रोशन क्रिकेट अकॅडमी संघाने पेण स्पोर्ट्स असोसिएशन संघावर अवघ्या दोन धावांनी निसटता विजय मिळवत स्पर्धेची चॅम्पियनशिप पटकावली. या रोमांचक सामन्यात शेवटपर्यंत कडवी झुंज देणाऱ्या पेण संघाला अखेर उपविजेतेपदावर समाधान मानावे लागले.
अंतिम सामन्यात प्रथम फलंदाजी करताना रोशन क्रिकेट अकॅडमी संघाने ३८.४ षटकांमध्ये सर्व गडी गमावत २०४ धावांचे आव्हानात्मक उद्दिष्ट उभे केले. रोशन अकॅडमीकडून फलंदाजीत विघ्नेश देशमुख याने ५० धावांची उत्कृष्ट अर्धशतकी खेळी केली, तर आर्यन पालांडे याने ३४ आणि रॉबिन वेल याने २७ धावांचे महत्त्वपूर्ण योगदान दिले. पेण स्पोर्ट्स कडून धारदार गोलंदाजी करताना हारदेव सिंह याने ४ आणि श्रवण वडे याने बहुमूल्य २ फलंदाज बाद केले.
२०५ धावांच्या आव्हानाचा पाठलाग करताना पेण स्पोर्ट्स संघाने शेवटच्या षटकापर्यंत कमालीचा संघर्ष केला. पेण संघाकडून नील कोळी याने ५६ धावांची शानदार अर्धशतकी खेळी केली, तसेच हर्ष म्हात्रे याने ३३ आणि निखिल भोईर याने ३२ धावा करत संघाला विजयाच्या उंबरठ्यावर आणले. सामना अंतिम टप्प्यात आला असताना आणि पेण संघाला विजयासाठी अवघ्या ३ धावांची गरज असताना रोशन अकॅडमीच्या गोलंदाजांनी उर्वरित फलंदाज बाद करत सामना फिरवला. पेणचा संपूर्ण संघ २०२ धावांवर बाद झाला आणि रोशन अकॅडमीने दोन धावांनी थरारक विजय साजरा केला. रोशन क्रिकेट अकॅडमीकडून उत्कृष्ट गोलंदाजी करत कर्णधार यश झावरे याने ५, पार्थ केसकर याने ३ तर रॉबिन वेल याने २ फलंदाज बाद करून संघाच्या विजयावर शिक्कामोर्तब केले.
स्पर्धेचा थरार संपल्यानंतर झालेल्या मुख्य पारितोषिक वितरण समारंभात वैयक्तिक कामगिरी करणाऱ्या खेळाडूंचा गौरव करण्यात आला. यामध्ये पेण स्पोर्ट्स संघाचा अष्टपैलू खेळाडू श्रवण वडे याला ‘मालिकावीर’ (मॅन ऑफ द सीरिज) म्हणून घोषित करण्यात आले. याशिवाय उत्कृष्ट फलंदाज म्हणून करण बोराडे, उत्कृष्ट गोलंदाज म्हणून ओम कांबळे आणि उत्कृष्ट क्षेत्ररक्षक म्हणून यश झावरे यांना सन्मानित करण्यात आले. आरडीसीएचे अध्यक्ष अनिरुद्ध पाटील, सदस्य अरुण शिंदे, मनोहर अहिर, प्रफुल्ल टेमघरे, बाळकृष्ण पाटील आणि दिनेश सावंत यांच्या हस्ते विजेत्या व उपविजेत्या खेळाडूंना सन्मानचिन्ह आणि फिरता चषक देऊन गौरविण्यात आले. या स्पर्धेच्या यशामुळे रायगड जिल्ह्यातील तरुण क्रिकेटपटूंना आपली गुणवत्ता सिद्ध करण्यासाठी एक उत्तम व्यासपीठ मिळाले आहे.