माणगावच्या अन्नत्याग आंदोलनाची खासदार सुप्रिया सुळे यांच्याकडून दखल; भावनाताई घाणेकर यांच्या माध्यमातून साधला संवाद

उरण (विठ्ठल ममताबादे)

रायगड जिल्ह्यातील सर्व १४ तालुके दुष्काळग्रस्त जाहीर करावेत, शेतकऱ्यांना हेक्टरी १ लाख रुपये आणि शेतमजुरांना २५ हजार रुपयांची आर्थिक मदत मिळावी, रोजगार हमी योजनेची कामे तत्काळ सुरू व्हावीत तसेच शेतकऱ्यांच्या मुलांचे शैक्षणिक शुल्क माफ करण्यात यावे, या प्रमुख मागण्यांसाठी माणगाव तहसील कार्यालयासमोर जाहीर अन्नत्याग आंदोलन सुरू आहे. राष्ट्रवादी काँग्रेस पार्टी (शरदचंद्र पवार) पक्षाचे तालुकाध्यक्ष राजू मोहन रोडेकर आणि विधानसभा अध्यक्ष संताजी पवार यांच्या नेतृत्वाखाली सुरू असलेल्या या आंदोलनाची खासदार सुप्रिया सुळे यांनी गांभीर्याने दखल घेतली आहे.

उरणच्या नगराध्यक्ष भावनाताई घाणेकर यांनी आंदोलनाला प्रत्यक्ष भेट देऊन आंदोलनकर्त्यांशी संवाद साधला. या प्रसंगी भावनाताई यांनी माणगावचे तहसीलदार विपिन लोकारे यांच्याशी सविस्तर चर्चा केली. त्यानंतर खासदार सुप्रिया सुळे यांच्याशी दूरध्वनीवरून संपर्क साधून आंदोलकांच्या तीव्र व्यथा व मागण्या त्यांच्या कानावर घातल्या. भावनाताईंच्या पुढाकारामुळे खासदार सुप्रिया सुळे यांनी थेट आंदोलनकर्त्यांशी संवाद साधला आणि संबंधित उच्च अधिकाऱ्यांशी चर्चा करून या सर्व मागण्या जिल्हाधिकारी व शासनापर्यंत तातडीने पोहोचविण्याचे स्पष्ट निर्देश दिले.

दरम्यान, या अन्नत्याग आंदोलनाचा आज चौथा दिवस उजाडला असला, तरी शासनाकडून अद्याप कोणताही ठोस निर्णय घेण्यात आलेला नाही. शेतकरी व शेतमजुरांच्या या न्याय्य हक्कांच्या लढ्याला भावनाताई घाणेकर यांनी आपला ठाम पाठिंबा दर्शविला असून, मागण्या मान्य होईपर्यंत या संघर्षात खंबीरपणे सोबत राहण्याचा निर्धार त्यांनी व्यक्त केला आहे.