अनंत नारंगीकर
उरण : दिघोडे बस स्थानकाजवळील उघड्यावर विकला जाणारा शोरमा हा खाद्यपदार्थ मूलांनी खाल्ल्याने ५ जणांना विषबाधा झाल्याची घटना शनिवारी (दि. २९) घडली आहे. त्यामुळे सदर मुलांच्या पोटात दुखायला लागले व उलट्या होऊ लागल्याने त्यांना तातडीने चिरनेर गावातील रवी क्लिनिक या रुग्णालयात दाखल करण्यात आले असता रुग्णालयातील डॉक्टर प्रकाश मेहता यांनी सदर मूलांवर उपचार सुरू केले. सदरची विषबाधा ही शोरमा हा खाद्यपदार्थ खाल्ल्याने झाला असल्याची माहिती सूत्रांकडून सांगण्यात येत आहे.
अन्न व औषध प्रशासनाने पैशाच्या हव्यासापोटी उरण तालुक्याकडे दुर्लक्ष केल्याने आज शहरात व तालुक्यातील अनेक गावातील नाक्यांवर राजरोसपणे उघड्यावरील खाद्यपदार्थ परप्रांतीय नागरीक विक्री करत आहेत. त्यामुळे उघड्यावरील अन्न खाल्ल्याने अनेकांना उलट्या, पोटात दुखण्याची कारणे समोर येत आहेत. त्यातच शनिवारी (दि. २९) दिघोडे बस स्थानकाजवळील रस्त्यावर विकला जाणारा शोरमा हा खाद्यपदार्थ शुभम पाटील, शुभम ठाकूर, निशांत भगत, रोहन पाटील व एक लहान मुलगा यांनी खाल्ल्याने त्यांना पोटात दुखायला लागले तसेच उलट्या होऊ लागल्याने त्यांना तातडीने चिरनेर गावातील रवी क्लिनिक रुग्णालयात पुढील उपचारासाठी दाखल केले. रुग्णालयातील डॉ. प्रकाश मेहता यांनी सदर रुग्णांवर उपचार सुरू केले. परंतु, आज डॉ. प्रकाश मेहता यांच्या तत्परतेने सदर रुग्णांचे प्राण वाचले आहे. तरी अन्न व औषध प्रशासनाच्या अधिकाऱ्यांनी नागरिकांच्या आरोग्याशी खेळणाऱ्या उघड्यावरील विक्री करणाऱ्या अशा व्यवसायिकांवर तातडीने कारवाई करावी अशी मागणी रहिवाशांकडून केली जात आहे.
सदर रुग्णांनी उघड्यावरील सुरमा हा अन्न पदार्थ खाल्ल्याने त्यांना फुड पॉईजन (अन्नातून विषबाधा) झाले आहे. त्यांची प्रकृती चांगली आहे. तरी नागरिकांनी विशेष करून लहान मुलांनी उघड्यावरील अन्न पदार्थ खाऊ नयेत.
-डॉ. प्रकाश मेहता