घन:श्याम कडू
उरण : नवी मुंबई पोलीस आयुक्तालयाच्या परिसरातील वाढती लोकसंख्या आणि पाच महिन्यांनी सुरू होत असलेल्या नवी मुंबई आंतरराष्ट्रीय विमानतळामुळे शहरातील पोलिसांना विस्ताराचे वेध लागले आहेत. या पार्श्वभूमीवर नवीन चार पोलीस ठाणे पुढील सहा महिन्यांच्या आत सुरू करण्याचे सूतोवाच सोमवारी नवी मुंबईचे पोलीस आयुक्त मिलिंद भारंबे यांनी केले. बेलापूर येथील नवी मुंबई पोलीस आयुक्तालयात झालेल्या पत्रकार परिषदेत ते बोलत होते.
या संबंधीचा प्रस्ताव गृह विभागाकडे अंतिम टप्यात असून नवीन चार पोलीस ठाण्यांसोबत नवीन तिसऱ्या परिमंडळ क्षेत्राची रचना सुद्धा नवीन सुरक्षेच्या आराखड्यात सुचविण्यात आली आहे. या प्रस्तावाला मंजुरी मिळाल्यानंतर तातडीने नव्या रचनेप्रमाणे परिमंडळ क्षेत्र आणि नवीन पोलीस ठाण्यांची निर्मिती केली जाणार आहे.नवी मुंबई पोलीस आयुक्तालयात सध्या विविध २० पोलीस ठाण्यांमधून शहरातील गुन्हेगारीवर नियंत्रण ठेवले जाते. पाच महिन्यानंतर नवी मुंबई आंतरराष्ट्रीय विमानतळातून प्रत्यक्षात वाहतूक सुरू होत असल्याने नवी मुंबईवर प्रवासी आणि निवासी लोकसंख्येचा ताण आणखी वाढणार आहे. त्यामुळेच पोलीस आयुक्त मिलिंद भारंबे यांनी सुरक्षेबाबतची खबरदारी घेण्यास सुरूवात केली असून आंतरराष्ट्रीय विमानतळाशेजारील परिसरात कडेकोट सुरक्षा ठेवण्याचे नियोजन पोलीस आयुक्तांनी आखले आहे. उलवा पोलीस ठाणे चार महिन्यांपूर्वी सुरू केले असून त्याचसोबत विमानतळ पोलीस ठाणे, करंजाडे, द्रोणागिरी आणि ऐरोली ही आणखी चार नवीन पोलीस ठाणी नव्याने सुरू करण्याचा प्रस्ताव गृह विभागाला पाठविला आहे. या प्रस्तावातील त्रुटी दूर करुन सूधारित प्रस्ताव सुद्धा गृह विभागाकडे मंजुरीसाठी पाठविण्यात आला आहे. या प्रस्तावाला अधिकृत मंजुरी मिळाल्यानंतर ही चार पोलीस ठाण्यांच्या इमारतीचे बांधकाम आणि यामध्ये काम करणाऱ्या मनुष्यबळाची तरतूद केली जाणार आहे.
गृह विभागाच्या मंजुरीनंतर तात्पुरत्या स्वरुपात पोलीस चौकी उभारुन त्यामधून कामकाज सुरू केले जाईल. दरम्यानच्या काळात करंजाडे, द्रोणागिरी आणि एअरपोर्ट या पोलीस ठाण्यांसाठी सिडकोकडे स्वतंत्र भूखंडाची मागणी करण्यात येईल. सध्या परिमंडळ १ व २ यांमधून २० पोलीस ठाण्यांच्या कारभारावर लक्ष ठेवले जाते. नवीन परिमंडळ ३ सुरू झाल्यानंतर पोलीस उपायुक्त दर्जाच्या अधिकाऱ्यांच्या देखरेखीखाली परिसराचे कामावर नियंत्रण ठेवले जाईल. परिमंडळाच्या विस्तारासोबत दोन स्वतंत्र सहाय्यक पोलीस आयुक्त कार्यालयांना सुद्धा गृह विभागाने मंजूरीचा प्रस्ताव गृह विभागाकडे पाठविण्यात आला आहे. यामध्ये सहाय्यक पोलीस आयुक्त बेलापूर (सीबीडी) यांच्याअंतर्गत सीबीडी, एनआरआय आणि नेरुळ या पोलीस ठाण्यांचा कारभार सुरू राहील तर सहाय्यक पोलीस आयुक्त खारघर यांच्या अंतर्गत खारघर, कळंबोली, कामोठे, तळोजा या वसाहतींचा कारभार केला जाईल अशी माहिती पोलीस उपायुक्त संजय पाटील यांनी दिली.