बाहे गावातील कलिंगडे निघाली परदेशाला!

जगदीश थिटे यांनी घेतले कलिंगडाचे उत्तम पिक

विश्वास निकम
कोलाड : रोहा तालुक्यात बाहे गाव हे भाजीपाला उत्पादनासाठी प्रसिद्ध गाव आहे. गावातील असंख्य शेतकरी अनेक वर्षांपासून उन्हाळ्यात भाजीपाला व्यवसाय करीत आहेत. एवढेच नाही तर १९८९च्या पुरामुळे गावाचे पुनर्वसन झाले, यामुळे आपल्या शेतीपासून येथील गावकऱ्यांना दूर रहावे लागले. परंतु तरीही येथील शेतकऱ्यांनी कधीही हार मानली नाही. उन्हाळ्यात शेतावर झोपडी बांधून भाजीपाला व्यवसाय सुरु ठेवला आहे.

बाहे येथील शेतकरी जगदीश थिटे यांनी भाजीपाला पिक सोडून यावर्षी कलिंगड पिक घेण्याचे ठरविले. सर्व मेहनत करुन कलिंगडाचे पिक उत्तम प्रकारे आले आहे. तसेच कलिंगडाचे फळंही मोठे झाले आहे. शिवाय रंग लालसर व त्याची चव अतिशय गोड असल्यामुळे या कलिंगडाला परदेशातून मागणी आल्यामुळे ही कलिंगड परदेशात रवाना झाली आहेत. यामुळे शेतकरी जगदीश थिटे यांनी केलेली मेहनत कामी आली असुन त्यांना या कलिंगड पिकापासून फायदा होणार असल्याचे दिसून येत आहे.