मुंबई : नाशिक परिक्षेत्राचे माजी विशेष पोलिस महानिरीक्षक व राज्य लोकसेवा आयोगाचे सदस्य डॉ. प्रताप दिघावकर यांनी बुधवारी भाजपमध्ये प्रवेश केला. भाजपचे प्रदेशाध्यक्ष चंद्रशेखर बावनकुळे यांनी त्यांचे पक्षात स्वागत केले. भाजप प्रदेश कार्यालयात हा प्रवेशाचा कार्यक्रम पार पडला. डॉ. दिघावकर यांच्यासोबत नाशिक जिल्ह्यातील विविध राजकीय पक्षांच्या कार्यकर्त्यांनी भाजपमध्ये प्रवेश केला.
‘रायगड जिल्ह्यातील डॉ. दिघावकर यांच्या प्रशासनातील अनुभवाचा पुरेपूर उपयोग करून घेतला जाईल. तसेच उत्तर महाराष्ट्रातील पाणी प्रश्न सोडविण्यासाठी पक्ष आणि सरकार पातळीवरून आवश्यक ते सर्व प्रयत्न केले जातील’, अशी ग्वाही बावनकुळे यांनी दिली. तर ‘भाजपच्या वाढीसाठी आपण समर्थपणे योगदान देऊ तसेच केंद्र व राज्य सरकारच्या माध्यमातून उत्तर महाराष्ट्रातील विकासाचे विविध प्रश्न सोडविण्यासाठी प्रयत्न करू’, असे दिघावकर यांनी सांगितले.
कोण आहेत प्रताप दिघावकर?
डॉ. प्रताप दिघावकर नाशिक जिल्ह्यातील बागलाण तालुक्यातील आहेत. ते शेतकरी कुटुंबातील आहेत. १९८७ मध्ये सटाणा येथे पोलीस उपअधीक्षक म्हणून रुजू झाले. २००१ मध्ये ते आयपीएस झाले. पुणे ग्रामीण आणि रायगडमध्ये त्यांनी पोलीस अधिक्षक तर मुंबईचे उपायुक्त म्हणूनही त्यांनी काम पाहिले.
पोलीस महानिरीक्षकपदी बढती मिळाल्यानंतर त्यांची नाशिक परिक्षेत्रात नियुक्ती झाली. या काळात त्यांनी शेतकऱ्यांसाठी केलेले काम विशेष गाजले. नाशिक परिक्षेत्रात नाशिक, नगर, धुळे, नंदुरबार, जळगाव हे जिल्हे येतात. या भागात शेतकऱ्यांच्या बांधावर जाऊन शेतमाल खरेदी करणारे व्यापारी येतात. माल घेऊन जातात, मात्र नंतर शेतकऱ्यांचे पैसे बुडवितात. अशा शेतकऱ्यांना पुढेच कोणीच वाली उतरत नाही. पोलिसही दखल घेत नाहीत. अशा परिस्थितीत दिघावकर यांनी विशेष अभियान राबवून अशा शेतकऱ्यांना पैस परत मिळवून देण्याचा प्रयत्न केला.
सर्व पोलीस ठाण्यांना अशा अर्जांची चौकशी करण्याच्या सूचना दिल्या. त्यानुसार सुमारे दीड हजारांवर अर्ज आले होते. यातून सुमारे ४६ कोटी रुपयांची फसवणूक झाल्याचे पुढे आले होते. पोलिसांनी कारवाई सुरू केली. सुमारे २०० व्यापाऱ्यांशी शेतकऱ्यांची तडजोड घडवून पैसे परत मिळवून दिले. ज्यांनी दिले नाहीत, त्यांच्यावर कारवाई केली. यामुळे दिघावकर यांचा नाशिक परिक्षेत्राचा अल्प काळाही शेतकऱ्यांसाठी फायद्याचा ठारला. त्याच आधारे ते आता धुळ्यातून निवडणूक लढविण्याची शक्यता आहे.
निवृत्तीनंतर दिघावकर यांची महाराष्ट्र लोकसेवा आयोगाचे सदस्य म्हणून काही काळ नियुक्ती झाली होती. त्यांच्या सेवापुस्तिकेतील जन्मतारखेवरून वाद झाला होता. मात्र, तो सरकारने निकालात काढून त्यांना दिलासा दिला होता. याशिवाय मुंबईवरील २६/११ च्या हल्ल्याचा तपासही दिघावकर यांनी केला होता.