राष्ट्रीय महामार्ग खात्याचे अधिकारी केवळ एसी कार्यालयातच? नागरिकांचा सवाल
महाड | मिलिंद माने
मुंबई-गोवा राष्ट्रीय महामार्ग (क्रमांक ६६) लगत असलेल्या सर्विस रोडवर वाढत्या अनधिकृत पार्किंगच्या समस्येमुळे वाहनधारक आणि नागरिकांना प्रचंड त्रास सहन करावा लागत आहे.
महाड शहर परिसरासह नागलवाडी, करंजखोल आणि पोलादपूर तालुक्याच्या हद्दीत सर्विस रोडवर जड वाहनांचे मनमानी पार्किंग, सिमेंट काँक्रीट मिक्सर आणि खासगी वाहनांची रांग दिसून येत आहे. परिणामी वाहतुकीत अडथळे निर्माण होत असून अपघातांचे प्रमाण वाढत आहे.
दरम्यान, राष्ट्रीय महामार्ग खात्याचे अधिकारी मात्र कार्यालयातील वातानुकूलित यंत्रणेच्या हवेत समाधान मानत आहेत, असा नागरिकांचा आरोप आहे.
वाहनचालक आणि नागरिकांना जीवाची भीती
महाडजवळील सर्विस रोडवर काही ठिकाणी रात्रीच्या वेळी प्रकाशव्यवस्था पूर्णपणे कोलमडली आहे. त्यामुळे दुचाकीस्वार आणि पादचारी या दोघांनाही रस्त्याचा अंदाज न आल्याने अपघातांची शक्यता वाढली आहे.
महाड शहराजवळील करंजखोल हद्दीत तर सर्विस रोडच्या कडेलाच गाई-म्हशी बांधण्याचे प्रकार सुरू असून त्याच ठिकाणी ट्रक आणि टेम्पोही पार्क केले जात आहेत. परिणामी रस्त्याची अडचण निर्माण होऊन अपघातांचे प्रमाण दिवसेंदिवस वाढत आहे.
अनधिकृत पार्किंगमुळे आधीच घेतलेला जीव
काही महिन्यांपूर्वी महाड तालुक्यातील बुटाला पेट्रोल पंपासमोरील सर्विस रोडवर अनधिकृत पार्किंग केलेल्या ट्रकला बाईकस्वार धडकून त्याचा मृत्यू झाला होता. या घटनेनंतरही प्रशासन जागे झालेले नाही.
नागरिकांनी वारंवार तक्रारी करूनही राष्ट्रीय महामार्ग खात्याकडून कोणतीही ठोस कारवाई न झाल्याने “दाद कोणाकडे मागायची?” असा प्रश्न जनतेसमोर उभा राहिला आहे.
प्रशासनाच्या उदासीनतेवर टीका
नागरिकांच्या तक्रारींनंतरही राष्ट्रीय महामार्ग विभाग आणि वाहतूक विभागाने अनधिकृत पार्किंगवर नियंत्रण आणण्यासाठी कोणतीही कायमस्वरूपी उपाययोजना केलेली नाही.
या ठिकाणी दररोज मोठ्या प्रमाणावर ट्रक, डंपर, मालवाहू वाहने आणि खासगी बस थांबवून ठेवली जातात. त्यामुळे वाहतुकीचा वेग मंदावतो आणि प्रवाशांना धोका निर्माण होतो.
स्थानिकांची मागणी – ठोस कारवाई आणि शिस्तबद्ध व्यवस्था
स्थानिक नागरिकांनी सर्विस रोडवरील अनधिकृत पार्किंग तातडीने हटवून नियमित दंडात्मक कारवाई करण्याची मागणी केली आहे. तसेच, या ठिकाणी स्पष्टपणे “पार्किंग झोन” निश्चित करून शिस्तबद्ध वाहतूक व्यवस्था निर्माण करण्याचे आवाहनही करण्यात आले आहे.
नागरिक म्हणतात, “महामार्गावर मोठा अपघात झाल्यानंतरच राष्ट्रीय महामार्ग खात्याचे अधिकारी जागे होतात. त्याआधी सर्व काही एसी कार्यालयातूनच चालते!”
अपघातानंतरच जागे होणार का अधिकारी?
महाड व पोलादपूर तालुक्याच्या सीमेवर असलेल्या महामार्गावरील अनधिकृत पार्किंग ही आता ‘टिकिंग टाइम बॉम्ब’ ठरली आहे.
प्रशासनाने तातडीने कारवाई न केल्यास मोठी दुर्घटना होण्याची शक्यता नाकारता येत नाही. त्यामुळे नागरिकांनी राष्ट्रीय महामार्ग प्राधिकरण आणि वाहतूक विभागाने संयुक्त मोहिम राबवून कडक दंडात्मक कारवाई करावी, अशी मागणी केली आहे.