कर्जत | प्रतिनिधी
लग्नाचा मंगलध्वनी, वाजतगाजत निघालेला वधू-वरांचा ताफा आणि त्याच वेळी लोकशाहीच्या पर्वाचा उत्साह-असा विलक्षण संगम कर्जतमध्ये पाहायला मिळाला. वृषाली कर्णूक या नवरीने लग्नाच्या मंडपातून सरळ मतदान केंद्रावर जाऊन मतदानाचा हक्क बजावला आणि हा प्रसंग सोशल मीडियावर जोरदार चर्चेत आला आहे.
विवाहाच्या पारंपरिक साडीमध्ये, पूर्ण दागदागिने परिधान करून आणि मंगल सोहळ्याच्या वातावरणात असतानाही वृषालीने “प्रथम मतदान, नंतर सर्व” हा आदर्श दाखवत मतदान केंद्राकडे प्रस्थान केले. तिच्यासोबत वर, नातेवाईक आणि काही पाहुणेदेखील मतदान केंद्रावर पोहोचले. लग्नाचा वेगळेपणा आणि नागरिकत्वाच्या कर्तव्याच्या भावनेचा संगम पाहून अनेकांनी नवरीचे कौतुक केले.
या घटनेचा व्हिडिओ सोशल मीडियावर व्हायरल झाला असून, कर्जत परिसरात या निर्णयाचे मोठे स्वागत केले जात आहे. अनेक तरुण मतदारांना अशा कृतीतून प्रेरणा मिळेल, असा विश्वास स्थानिक नागरिक व्यक्त करत आहेत. मतदान म्हणजे फक्त अधिकार नाही, ती जबाबदारी आहे. कोणत्याही प्रसंगात ती पार पाडलीच पाहिजे, असे वृषाली यांनी मतदानानंतर सांगितल्याचे सूत्रांनी सांगितले.
मतदानाचा टक्का वाढवण्यासाठी निवडणूक आयोग सतत जनजागृती करत असताना, वृषालीसारख्या मतदारांनी दिलेला संदेश विशेष ठरत आहे. लग्नासारख्या आनंदोत्सवाच्या क्षणीही मतदानाला प्राधान्य देऊन वृषालीने कर्जत तालुक्यात एक सकारात्मक उदाहरण घातले आहे.
या अनोख्या निर्णयामुळे नवरी वृषाली कर्णूक ही केवळ विवाहसोहळ्यातच नव्हे तर सोशल मीडियावर आणि कर्जतच्या राजकीय वर्तुळातही चर्चेचा केंद्रबिंदू ठरली आहे. तिच्या या पावलाने लग्न असो वा कोणताही क्षण, लोकशाही प्रथम हा प्रभावी संदेश पुन्हा अधोरेखित झाला आहे.