तटकरे विरुद्ध गोगावले यांच्या संघर्षात राष्ट्रवादी आघाडीवर
माणगाव । सलीम शेख
रायगडचा राजकीय नकाशा आज हललेला आहे. दहा नगरपरिषदांची निवडणूक म्हणजे फक्त तांत्रिक प्रक्रिया नव्हे तर दशकानुदशके उभे राहिलेले प्रभावक्षेत्र, व्यक्तीगत करिष्मा, स्थानिक समीकरणे आणि महायुती-महाविकास आघाडीतील अंतर्गत राजकारण यांचे मोठे चित्र. राजकीय विश्लेषक सध्या ज्या आकडेवारीकडे बोट दाखवत आहेत. ७ राष्ट्रवादी आणि भाजप २ शिवसेना, १ शेकाप ही फक्त संख्या नाही, तर रायगडच्या बदलत्या राजकीय मनोवृत्तीचा ठळक संकेत आहे.
रणनीती, आक्रमकता आणि संघटनेवरील पकड
खासदार सुनील तटकरे हे या संपूर्ण निवडणुकीतील सर्वात प्रभावी आणि निर्णायक व्यक्तिमत्त्व ठरले आहेत. महाडपासून माथेरानपर्यंत, उरणपासून रोह्यापर्यंत
कार्यकर्त्यांवर असलेली त्यांची पकड आणि संघटनशक्तीमुळे संपूर्ण जिल्ह्यात तटकरे लाट स्पष्टपणे जाणवते. राजकारणातील जाणकार आज एकच वाक्य बोलताना दिसतात, “तटकरे यांनी केवळ प्रचार केला नाही, त्यांनी संपूर्ण निवडणूक स्वतःच्या नेतृत्वात उभारली.” त्याचा परिणाम म्हणूनच ७ नगरपरिषदांचा वारा राष्ट्रवादी–भाजप युतीकडे झुकत असल्याचे संकेत आहेत.
शिवसेनेचा संघर्ष — गोगावले, थोरवे, दळवी यांची प्रतिष्ठेसाठी धडपड
शिवसेना-शिंदे गटाची लढाईही कमी धडाडीची नव्हती. मंत्री भरत गोगावले महाड–श्रीवर्धन–रोह्यात रणशिंग फुंकताना दिसले. आमदार महेंद्र दळवी अलिबाग, पेण, मुरुड, रोह्यात तुफानी असल्याचे चित्र आहे. आमदार महेंद्र थोरवे कर्जत, माथेरान, खोपोलीत तळ ठोकून होते. शिवसेनेचे प्रयत्न प्रखर आहेत. परंतु, जनमताच्या दिशेने राष्ट्रवादी–भाजप आघाडी थोडी वरचढ ठरल्याचे संकेत मिळत आहेत. २ नगरपरिषदांपर्यंत शिवसेनेची पकड घट्ट राहील, असा अंदाज आहे.
शेकापची पायाभूत ताकद अद्याप जिवंत
अलिबाग नगरपरिषद शेकापकडे झुकते आहे. ही गोष्ट सिद्ध करते की रायगडातील शेकापची मुळे आजही जिवंत आहेत आणि त्यांचा पारंपरिक प्रभाव अजूनही कमी झालेला नाही.
निकाल धक्कादायक असू शकतो : सापशिडीचे राजकारण
या निवडणुकीच्या निकालाबद्दल कुजबुज सुरू आहे. काही ठिकाणी इतकी शांत लढाई झाली आहे की, निकाल पाहून सर्वांचे डोळे विस्फारतील. काही ठिकाणी अंतर्गत भांडणांनी समिकरणे बदललीत. काही ठिकाणी स्थानिक मुद्द्यांनी मोठे चित्र बदलले आहे. धक्कादायक निकालांची शक्यता नाकारता येत नाही.
महाड — तटकरे विरुद्ध गोगावले : राजकीय भवितव्य निकालानंतर
रायगडमधील सर्वात संवेदनशील आणि प्रतिष्ठेची निवडणूक म्हणजे महाड नगरपरिषद होय. येथील धडक सामन्यावर दोन नावांचे राजकीय भविष्य अवलंबून आहे ते म्हणजे खासदार सुनील तटकरे आणि मंत्री भरत गोगावले यांचे. महाडचा निकाल ठरवेल रायगडच्या पुढील दशकाचे राजकारण कोणत्या दिशेने वळणार. या दोन्ही नेत्यांसाठी ही निवडणूक प्रतिष्ठेचीच नाही, तर राजकीय भविष्यासाठी निर्णायक आहे.
महायुतीचे गणित : निकालानंतर नवा खेळ
निकाल लागल्यानंतर जिथे गरज भासेल तिथे राष्ट्रवादी + भाजप + शिवसेना (शिंदे) या तिन्ही पक्षांमध्ये महायुती उभी राहू शकते. यामुळे काही नगरपरिषदांत सत्ता कोणाची, नगराध्यक्ष कोणाचा हे निकालानंतरही बदलू शकते.
रायगड तटकरेंकडे झुकत आहे, पण निकालच अंतिम सत्य
रायगडच्या जनता-मनाचा नाडी-स्पंदन आज स्पष्ट सांगत आहे. तटकरे प्रभाव प्रबळ आहे. त्यांचा करिष्मा, संघटनशक्ती आणि महायुतीतील समन्वय यामुळे ७ नगरपरिषदांवर पकड मिळण्याची शक्यता मोठी आहे. परंतु…रायगड हा नेहमीच शेवटच्या क्षणी निर्णय देणारा जिल्हा राहिला आहे. म्हणूनच…तटकरे वरचढ ठरणार? की गोगावले चमत्कार करतील? की निकाल पूर्णपणे चित्र बदलून टाकेल? हे सर्व फक्त अंतिम निकालच ठरवणार आहे. परंतु एक गोष्ट निश्चित आहे की, रायगड जिल्ह्याच्या इतिहासातील ही सर्वाधिक चुरशीची, प्रतिष्ठेची आणि सत्ता निश्चित करणारी निवडणूक आहे.