अलिबाग: शिवसेना (उद्धव बाळासाहेब ठाकरे) नेते अंबादास दानवे यांनी ‘एक्स’ (पूर्वीचे ट्विटर) वर एका आमदाराच्या समोर नोटांच्या बंडलांचा ढिग असलेला व्हिडीओ पोस्ट केल्यानंतर शिंदे गटात खळबळ उडाली असतानाच, आज शेतकरी कामगार पक्षाच्या (शेकाप) प्रवक्त्या चित्रलेखा पाटील यांनी शिंदे गटाचे मंत्री भरत गोगावले यांच्यावर आणखी एक ‘मनीबॉम्ब’ टाकला आहे.
गोगावलेंचा नोटांच्या बंडलांसह असलेला व्हिडीओ समोर
शेकापच्या प्रवक्त्या चित्रलेखा पाटील यांनी प्रसारमाध्यमांसमोर एक व्हिडीओ दाखवला, ज्यात मंत्री भरत गोगावले नोटांच्या बंडलांसह दिसत आहेत. हा ‘मनीबॉम्ब-2’ असल्याचे सांगत पाटील यांनी सवाल केला की, “ठेकेदारांकडून मिळणाऱ्या कमिशनची ही बंडले आहेत काय?”
दानवेंचा पहिला ‘मनीबॉम्ब’: हिवाळी अधिवेशनादरम्यान अंबादास दानवे यांनी लाल टी-शर्ट घातलेल्या व्यक्तीसमोर नोटांच्या राशीचा व्हिडीओ पोस्ट केला होता. यानंतर शिंदे गटाचे आमदार महेंद्र दळवी यांच्यावर निशाणा साधला गेला. दळवी यांनी हा व्हिडीओ मॉर्फ (बनावट) असल्याचा आणि आपला याच्याशी काही संबंध नसल्याचा दावा करत संताप व्यक्त केला.
चौकशीची मागणी: पाटील यांनी दळवी आणि गोगावले यांच्या दोन्ही व्हिडीओची सीबीआय, ईडी आणि अँटी करप्शन ब्युरो मार्फत सखोल चौकशी करण्याची मागणी केली आहे.
‘चिटर आमदार’ आणि गुन्हेगारी पार्श्वभूमी
चित्रलेखा पाटील यांनी महेंद्र दळवी यांच्यावर कठोर टीका करत ते ‘चिटर आमदार’ असल्याचे म्हटले,दळवी हे महाराष्ट्रात सर्वाधिक गुन्हे दाखल असलेल्या आमदारांपैकी एक आहेत, असे कागदपत्रे पाटील यांनी दाखवले. त्यांच्यावर घरगुती हिंसाचारापासून अनेक गुन्हे दाखल आहेत. राष्ट्रवादीचे प्रदेशाध्यक्ष, खासदार सुनील तटकरे हे वारंवार दळवी जनतेची कशी फसवणूक करत आहेत, हे सांगत असल्याकडेही पाटील यांनी लक्ष वेधले.
गोगावलेंची सारवासारव
चित्रलेखा पाटील यांनी व्हिडीओ बॉम्ब टाकल्यानंतर मंत्री भरत गोगावले यांची मोठी धावपळ झाली. त्यांनी प्रसारमाध्यमांच्या प्रतिनिधींशी बोलताना स्पष्टीकरण दिले, ”मी फक्त नावाचाच शेठ आहे. माझ्याकडे इतके पैसे नाहीत. इतके पैसे माझ्याकडे असते तर मी मुंबईत घर घेतले असते. मी बँकेतून कर्ज घेऊन घर घेतले आहे. माझी कोणतीही चौकशी करा.
पाटील यांनी प्रश्न उपस्थित केला की, “अलिबागमध्ये अनेक कामे अर्धवट आहेत. ठेकेदार सांगतात की, ते आमदारांच्या कमिशनखाली दबले आहेत. त्यामुळे ही कॅश या कमिशनची तर नाही ना?” त्यांनी मुख्यमंत्री एकनाथ शिंदे यांना गोगावले यांच्या प्रत्येक खात्याची आणि संबंधित अधिकाऱ्यांची चौकशी करण्याची मागणी केली.
तटकरेंची उपरोधिक टीका आणि चौकशीची मागणी
अजित पवार गटाचे प्रदेशाध्यक्ष सुनील तटकरे यांनी या प्रकरणावर उपरोधिक टोला लगावला आणि केंद्रीय तपास यंत्रणांकडून चौकशीची मागणी केली. दळवी यांना ‘देशभक्त आमदार’ असे उपहासाने संबोधित करत तटकरे म्हणाले की, ते निष्पाप आहेत आणि व्हिडीओ मॉर्फ असल्याचे त्यांचे म्हणणे आहे.
दळवी यांनी ‘राष्ट्रीय खलनायका’ने हा व्हिडीओ दानवे यांना दिल्याचा आरोप केला होता, ज्यावरून तटकरे यांच्यावर संशय व्यक्त केला गेला होता. यावर खुलासा करताना तटकरे यांनी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्याकडे मागणी केली की, त्यांनी हा व्हिडीओ खरा आहे की मॉर्फ, याची तपासणी करावी. तटकरे यांनी या प्रकरणाचा तपास लवकरात लवकर पूर्ण करावा आणि जे दोषी आढळतील त्यांच्यावर ‘302 सारखे’ (खुनाचे कलम) गुन्हे लावता आले तर तेही लावावेत, अशी मागणी केली.
या सर्व आरोपांमुळे विधिमंडळाच्या अधिवेशनाचे वातावरण चांगलेच तापले असून शिंदे गटाला टीकेचा सामना करावा लागत आहे.