रायगडमध्ये भरत गोगावलेंना ‘लॉटरी’; प्रजासत्ताक दिनी ध्वजवंदनाचा मान, आदिती तटकरेंची संधी हुकली

पालकमंत्रिपदाचा तिढा कायम असतानाच राज्य सरकारचा मोठा निर्णय; भुजबळांना यादीतून डच्चू

मुंबई/रायगड: गेल्या अनेक दिवसांपासून ध्वजवंदनाच्या संधीची प्रतीक्षा करणारे शिवसेनेचे प्रतोद आणि आमदार भरत गोगावले यांची प्रतीक्षा अखेर संपली आहे. आगामी २६ जानेवारी २०२६ रोजी प्रजासत्ताक दिनी रायगड जिल्हा मुख्यालयात आयोजित शासकीय समारंभात भरत गोगावले यांच्या हस्ते ध्वजवंदन होणार आहे. सामान्य प्रशासन विभागाने बुधवारी (२१ जानेवारी) काढलेल्या शासन परिपत्रकामुळे यावर शिक्कामोर्तब झाले असून, यामुळे रायगडच्या पालकमंत्री आदिती तटकरे यांची ध्वजवंदनाची संधी यंदा हुकली आहे.

राजकीय तिढा आणि गोगावलेंचा मान

मुख्यमंत्री देवेंद्र फडणवीस यांच्या नेतृत्वाखालील सरकारमध्ये रायगड आणि नाशिकच्या पालकमंत्रिपदावरून महायुतीत दीर्घकाळापासून रस्सीखेच सुरू आहे. रायगडच्या पालकमंत्रिपदासाठी भरत गोगावले इच्छुक असतानाच, प्रशासकीय पातळीवर त्यांना ध्वजवंदनाचा मान देऊन एका अर्थाने त्यांचे राजकीय वजन वाढवल्याची चर्चा सुरू झाली आहे. गोगावले यांनी यापूर्वी अनेकदा ध्वजारोहणाची संधी मिळावी अशी इच्छा व्यक्त केली होती, जी आता पूर्ण होत आहे.

भुजबळ यादीतून गायब, महाजनांकडे नाशिक

राज्य सरकारने जाहीर केलेल्या यादीत नाशिक जिल्ह्याची जबाबदारी गिरीश महाजन यांच्याकडे सोपवण्यात आली आहे. विशेष म्हणजे, अन्न व नागरी पुरवठा मंत्री छगन भुजबळ यांच्या नावाचा या ध्वजवंदनाच्या यादीत समावेश नसल्याने राजकीय वर्तुळात भुवया उंचावल्या आहेत.

जिल्हा आणि ध्वजारोहण करणाऱ्या मंत्र्यांची नावे पुढीलप्रमाणे

• मुंबई शहर – मंगल प्रभात लोढा
• मुंबई उपनगर – ॲड. आशिष शेलार
• पालघर – गणेश नाईक
• जळगाव – गुलाबराव पाटील
• अमरावती – दादाजी भुसे
• यवतमाळ – संजय राठोड
• रत्नागिरी – उदय सामंत
• धुळे – जयकुमार रावल
• जालना – पंकजा मुंडे
• नांदेड – अतुल सावे
• चंद्रपूर – डॉ. अशोक उईके
• सातारा – शंभुराज देसाई
• वाशिम – दत्तात्रय भरणे
• लातूर – शिवेंद्रसिंह भोसले
• नंदुरबार – योगेश कदम
• सोलापूर – जयकुमार गोरे
• हिंगोली – नरहरी झिरवाळ
• भंडारा – संजय सावकारे
• छत्रपती संभाजीनगर – संजय शिरसाट
• धाराशिव – प्रताप सरनाईक
• बुलढाणा – मकरंद जाधव (पाटील)
• सिंधुदुर्ग – नितेश राणे
• अकोला – आकाश फुंडकर
• कोल्हापूर – प्रकाश आबिटकर
• गडचिरोली – ॲड. आशिष जयस्वाल
• वर्धा – डॉ. पंकज भोयर
• परभणी – मेघना दीपक साकोरे-बोर्डीकर
• गोंदिया – इंद्रनील नाईक