रोहा तालुक्यातील सामान्य कुटुंबातील तरुणाची उत्तुंग भरारी; मिरवणूक काढून जंगी स्वागत
धाटाव | शशिकांत मोरे
अथक परिश्रम, प्रामाणिकपणा आणि जिद्दीच्या जोरावर रोहा तालुक्यातील धाटाव येथील श्रेयश उदय राणे याने भारतीय नौदलात (Indian Navy) ‘सिनियर सेलर’ पदाला गवसणी घातली आहे. एका अत्यंत सामान्य कुटुंबातून आलेल्या श्रेयशच्या या यशामुळे संपूर्ण तालुक्यातून त्याच्यावर कौतुकाचा वर्षाव होत आहे.
कौटुंबिक पाठबळ आणि शैक्षणिक प्रवास
श्रेयशचे प्राथमिक व माध्यमिक शिक्षण रोह्यातील जगन्नाथ राठी समूहाच्या इंग्लिश मीडियम स्कूलमध्ये झाले. लहानपणापासूनच देशसेवेची ओढ असल्याने त्याने मिरज येथील ‘रॉयल ऑफिसर्स प्रेप्रोविरिटी अकॅडमी’मध्ये पुढील प्रशिक्षण घेतले. या प्रवासात त्याला त्याचे आजोबा सुरेश राणे, आजी सुरेखाताई, वडील उदय आणि आई स्नेहल राणे यांच्यासह संपूर्ण कुटुंबाचे भक्कम पाठबळ लाभले.
यशाचा मार्ग: कठोर मेहनत
श्रेयशने मुंबईतील वांद्रे येथे ‘स्टेज १’ ची परीक्षा यशस्वीपणे पूर्ण केली. त्यानंतर कुलाबा येथील आय.एन.एस. अँग्रेलो (INS Angre) साठी झालेल्या कठीण परीक्षेतही त्याने घवघवीत यश संपादन केले. अकॅडमीतील डॉ. गीतांजली शिंदे, सतीश पुणेकर, अमित पाटील आणि माधुरी नाईक या शिक्षकांचे मार्गदर्शन त्याला या यशासाठी मोलाचे ठरले.
गावकऱ्यांकडून जंगी स्वागत
श्रेयशच्या निवडीचे वृत्त समजताच धाटावमध्ये आनंदाचे वातावरण पसरले. मित्रपरिवाराने ढोल-ताशांच्या गजरात त्याची भव्य मिरवणूक काढली. आपल्या मुलाचे यश पाहून राणे कुटुंबाच्या डोळ्यात आनंदाश्रू तरळले. श्रेयश आता पुढील चार महिन्यांच्या प्रशिक्षणासाठी ओडिसा येथे रवाना होणार असून, त्यानंतर तो प्रत्यक्ष सेवेत रुजू होईल.
”योग्य मार्गदर्शन आणि कठोर परिश्रमाच्या जोरावर कोणतेही ध्येय गाठता येते. यापुढे लेफ्टनंट किंवा मेजर यांसारख्या उच्च पदांपर्यंत पोहोचण्यासाठी मी माझे प्रयत्न सुरूच ठेवणार आहे.”
— श्रेयश राणे