वैभव कळस
म्हसळा : महाराष्ट्र राज्याच्या घडामोडीत गेली १८ महिने चाललेल्या शिवसेना पक्षप्रमुख उद्धव ठाकरे गट आणि शिवसेना शिंदे गट यांच्या राजकीय वाक् युद्धात खरी शिवसेना कोणाची आणि आमदार अपात्र ठरविणेबाबत अंतिम निकाल दि. १० जानेवारी रोजी विधानसभा अध्यक्ष राहुल नार्वेकर यांनी जाहीर केला आहे. राहुल नार्वेकर यांनी खरी शिवसेना ही मुख्यमंत्री एकनाथ शिंदे यांचीच असून दोन्ही गटाचे आमदार पात्र असल्याचा निकाल दिल्याने शिवसेना पक्षप्रमुख उद्धव ठाकरे शिवसेनेच्या गटात मोठ्या प्रमाणात नाराजी पसरली आहे. नार्वेकर यांनी मूळ शिवसेना असलेल्या उद्धव ठाकरे गटाविरोधात निकाल दिल्याने म्हसळा तालुका शिवसेनेने प्रचंड नाराजी व्यक्त करून राहुल नार्वेकर यांनी दिलेल्या निकालाचा जाहीर निषेध केला आहे.
विधानसभा अध्यक्ष राहुल नार्वेकर यांचा निषेध केल्याचे आणि निषेध पत्र त्यांच्यापर्यंत पोहोच करण्यासाठी म्हसळा तालुका शिवसेना यांच्या मार्फत तालुकाप्रमुख सुरेश कुडेकर यांनी म्हसळा तहसीलदार समीर घारे, म्हसळा पोलीस ठाण्याचे निरीक्षक संदीपान सोनवणे यांच्याकडे सुपूर्द केले आहे. यावेळी त्यांच्या समवेत शिवसेना तालुका अधिकारी कौस्तुभ करडे, दिपल शिर्के, कृष्णा म्हात्रे, राजाराम टिलटकर, सुजित येलवे, अमजत साने, मंगेश पयेर, अतिफ उकये, पवन मर्चंडे आदी शिवसैनिक उपस्थित होते.