प्रतिनिधी
अलिबाग : रायगड जिल्ह्यातील अलिबाग येथील नामांकित जेएसएम महाविद्यालयास नॅकची ‘अ’ श्रेणी प्राप्त झाली आहे. महाविद्यालयाने मिळवलेल्या या घवघवीत यशाबद्दल जनता शिक्षण मंडळाचे अध्यक्ष ॲड. गौतम पाटील, प्राचार्य डॉ. सोनाली पाटील, प्राध्यापक, शिक्षक, शिक्षकेतर कर्मचारी, विद्यार्थी यांच्यावर सर्व स्तरांतून कौतुकाचा वर्षाव होत आहे. ॲड. गौतम पाटील, उपाध्यक्षा डॉ. साक्षी पाटील, सेक्रेटरी गौरव पाटील यांनी महाविद्यालयातील प्राध्यापक, शिक्षक, शिक्षकेतर कर्मचारी, विद्यार्थी, माजी विद्यार्थी, पालक यांनी या सर्व प्रक्रियेत दिलेल्या बहुमूल्य योगदानाबद्दल मनःपूर्वक अभिनंदन केले आहे.
दिनांक २१ व २२ मे २०२४ रोजी अलिबाग येथील जेएसएम महाविद्यालयास बेंगळुरू येथील नॅक पिअर टीमने भेट दिली. या टीममध्ये अध्यक्ष म्हणून प्रा. डॉ. विजयकुमार सी. जी., कुलगुरु महर्षी पाणीनी संस्कृत आणि वैदिक विद्यापीठ, उज्जैन, मध्यप्रदेश; समन्वयक म्हणून प्रा. डॉ. रणबीरसिंग जगलान, प्राध्यापक, चौधरी चरणसिंग कृषी विद्यापीठ, हिसार, हरियाणा तर सदस्य म्हणून प्रा. डॉ. नारायणम्मा तिरूमला, प्राचार्य, पद्मावती वुमन्स डिग्री अँड पीजी कॉलेज, तिरुपती, आंध्रप्रदेश यांचा समावेश होता. शैक्षणिक संस्थांचे मूल्यमापन करून त्यांचा दर्जा ठरविण्याकरिता दर पाच वर्षांनी देशभरातील महाविद्यालयांना राष्ट्रीय मूल्यांकन आणि अधिस्वीकृती परिषद म्हणजेच ‘नॅक’तर्फे त्रिसदस्यीय समिती भेट देऊन महाविद्यालयातील शैक्षणिक, सहशैक्षणिक उपक्रम, महाविद्यालयातील विविध सुविधा, प्रशासकीय कार्यालय यांचे परीक्षण करून तसेच संस्थेचे पदाधिकारी, प्राचार्य, प्राध्यापक, विद्यार्थी, माजी विद्यार्थी, पालक यांच्याशी संवाद साधून महाविद्यालयाच्या शैक्षणिक गुणवत्तेचा दर्जा निश्चित करत असते.
जेएसएम महाविद्यालयास भेट दिलेल्या समितीने महाविद्यालयातील वर्गखोल्या, प्रयोगशाळा, विविध शैक्षणिक विभाग, ग्रंथालय, मैदान, जिमखाना, वनस्पती उद्यान, प्रशासकीय कार्यालय, रंगमंच, ॲम्फीथिएटर, स्मार्ट क्लासरूम, अकाऊंट म्युझियम, कॅन्टीन व इतर सुविधांची पाहणी केली. तसेच गेल्या पाच वर्षात महाविद्यालयाने शैक्षणिक व सह शैक्षणिक क्षेत्रात केलेल्या कामगिरीचा आढावा घेऊन विद्यार्थी, माजी विद्यार्थी, पालक, शिक्षक, शिक्षकेतर कर्मचारी यांच्याशी संवाद साधला.
‘‘साठ वर्षांची परंपरा असलेल्या या महाविद्यालयाने शैक्षणिक, सहशैक्षणिक व भौतिक सुविधांच्या बाबतीत केलेली कामगिरी उल्लेखनीय असून येणाऱ्या काळात हे महाविद्यालय या सर्व क्षेत्रांमध्ये आपल्या कामगिरीचा आलेख आणखी उंचावत नेणार आहे’’, असा विश्वास समितीचे अध्यक्ष प्रा. डॉ. विजयकुमार सी. जी. यांनी व्यक्त केला. या भेटीदरम्यान विद्यार्थ्यांनी सादर केलेल्या सांस्कृतिक कार्यक्रमांचे या समितीने विशेष कौतुक केले.
ही नॅक मूल्यांकन प्रक्रिया यशस्वीरित्या पूर्ण करण्यासाठी जनता शिक्षण मंडळाचे अध्यक्ष ॲड. गौतम पाटील यांच्या मार्गदर्शनाखाली प्राचार्य डॉ. सोनाली पाटील, महाविद्यालयाचे माजी प्राचार्य डॉ. अनिल पाटील, निवृत्त प्राध्यापक प्रा. सुरेंद्र दातार, आयक्युएसी समन्वयक डॉ. प्रीती फाटे, आयक्युएसी समिती सदस्य, प्राध्यापक, शिक्षक, शिक्षकेतर कर्मचारी, विद्यार्थी यांनी विशेष परिश्रम घेतले.