जे. एम. म्हात्रे चॅरिटेबल संस्थेचे यशस्वी आयोजन
विनायक पाटील
पेण : आज “विमानतळ रोजगार मार्गदर्शन शिबिराचे” पहिले शिबिर 700 पेक्षा जास्त तरुणांच्या उपस्थितीत यशस्वीरित्या पनवेलमधील व्ही. के. हायस्कूल येथे पार पडले. यावेळी उपस्थित तरुणांना सुनील गायकवाड (एक्स. सीनियर मॅनेजर, एअर इंडिया कमर्शियल डिपार्टमेंट), भूषण खैरे (एअरपोर्ट ऑपरेशन्स इन,कॉन्टस ऑस्ट्रेलियन एअरलाइन्स), सर्वेश पाटील (कस्टमर एक्झिक्युटिव्ह, एअर इंडिया मुंबई एअरपोर्ट), रुद्राश गोवारी (एअर इंडिया, गोवा एअरपोर्ट) वसीम सर (फिनिक्स एअरपोर्ट ट्रेनिंग अकॅडमी) यांनी मार्गदर्शन केले.
यामध्ये प्रामुख्याने जॉब कोणत्या एअरलाइन्समध्ये आहेत, इंटरव्यूसाठी जाताना कसा ड्रेस कोड पहिजे, आपले डॉक्युमेंट कशाप्रकारे असावेत, नक्की कामाचं स्वरूप काय आहे, ड्युटीची वेळ किती तास आणि कुठल्या शिफ्ट असतात, तुमच्या आत्मविश्वासावर,बोलण्याच्या कलेवरती आणि शिक्षणावर तुमचं सिलेक्शन होतं अशाप्रकारे मार्गदर्शन उपस्थित विद्यार्थ्यांना मिळाले. विद्यार्थ्यांना इंग्रजी आणि हिंदी या दोन भाषेचे ज्ञान असणे महत्त्वाचे यासाठी त्यांनी विविध ऑनलाईन किंवा ऑफलाईन इंग्रजीचे कोर्सेस केलात तरी सुद्धा पंधरा दिवसात बोलण्या आणि समजण्या इतपत इंग्रजी शिकू शकता असे मान्यवरांनी सांगितले.
यावेळी प्रमुख पाहुणे म्हणून मा. आमदार बाळाराम पाटील, काशिनाथ पाटील (मा.प..पं.स. सभापती), गोपाळ भगत, मा. नगरसेविका प्रीती जॉर्ज आणि सारिका भगत, देवा पाटील (जिल्हाध्यक्ष पु.यु.सं.रायगड), बबन विश्वकर्मा हे उपस्थित होते.
भविष्यात आपल्या पनवेलमध्ये सुरू होणाऱ्या स्वर्गीय दि. बा. पाटील आंतरराष्ट्रीय विमानतळात आपल्या विभागातील जास्तीत जास्त तरुण नोकरीसाठी तांत्रिकदृष्ट्या सक्षम होतील त्या दृष्टीने उचललेले हे पहिले पाऊल आहे. या पुढील भविष्यात अशा प्रकारे विविध शिबिर शेतकरी कामगार पक्ष आणि जे. एम. म्हात्रे चॅरिटेबल संस्थेच्या माध्यमातून राबवण्याचा माझा मानस आहे. असे प्रितम जनार्दन म्हात्रे जे. एम. म्हात्रे चॅरिटेबल संस्था यांनी बोलताना सांगितले.