शिष्यवृत्ती परीक्षेत रोहा तालुक्यात नुपूर गोयजी प्रथम तर जिल्ह्यात चौथी

विश्वास निकम
कोलाड : महाराष्ट्र राज्य परीक्षा परिषद पुणे यांच्यामार्फत घेण्यात आलेल्या पूर्व उच्च प्राथमिक शिष्यवृत्ती परीक्षा फेब्रुवारी २०२४ चा निकाल जाहीर करण्यात आला. या परीक्षेत नगरपरिषदेच्या रावसाहेब कुलकर्णी विद्यामंदिर शाळा क्रमांक ९ येथे शिकत असलेली कु. नुपूर हेमकांत गोयजी हिने ३०० गुणांपैकी तब्बल २४८ गुण मिळवून रोहा तालुक्यात प्रथम तर रायगड जिल्ह्यात गुणवत्ता यादीत चौथा क्रमांकाने येण्याचा बहुमान पटकावला.

सदर या परीक्षेची पूर्वतयारी तीचे मार्गदर्शक सुविधा दांडेकर यांनी करून घेतली. या उज्ज्वल यशाबद्दल शाळा व्यवस्थापन समिती तसेच नगरपरिषदेचे अधिकारी वर्गाकडून कौतूक केले जात आहे तर तालुक्यात प्रथम आणि जिल्हास्तरावर चौथी आल्याबद्दल तालुक्याचे गटशिक्षणाधिकारी मेघना धायगुडे यांनी आनंद व्यक्त केला असून तिच्या या घवघवीत यशाबद्दल विविध क्षेत्रातून तिचे अभिनंदन करत शुभेच्छांचा वर्षाव होत आहे.