पालकमंत्री भरत गोगावले, आ. महेंद्र दळवींची राजू साबळे व तटकरे कुटुंबावर जोरदार टीका
माणगाव (सलीम शेख)माणगावच्या राजकारणात मोठी उलथापालथ होत असून, राष्ट्रवादी काँग्रेस पक्षाला मोठा झटका बसला आहे. गांधी मेमोरियल हॉलमध्ये शनिवारी (ता. १४) पार पडलेल्या शानदार पक्षप्रवेश सोहळ्यात राष्ट्रवादी काँग्रेसच्या विद्यमान नगरसेवकांच्या कुटुंबीयांसह माजी नगराध्यक्ष, अनेक पदाधिकारी आणि हजारो कार्यकर्त्यांनी राज्याचे रोजगार हमी योजना मंत्री तथा रायगडचे पालकमंत्री भरत गोगावले, अलिबागचे आमदार महेंद्र दळवी, युवासेनाप्रमुख विकास गोगावले यांच्या प्रमुख उपस्थितीत शिवसेना (शिंदे गट) पक्षात जाहीर प्रवेश केला. या मेगा पक्षप्रवेशामुळे माणगावच्या राजकीय वर्तुळात मोठी खळबळ उडाली आहे.
जाहिरात (Advertisement)
या सोहळ्यात माणगाव नगरपंचायतीचे माजी नगराध्यक्ष तथा विद्यमान नगरसेवक आनंद यादव यांच्या पत्नी तथा माजी नगरसेविका भाग्यश्री यादव, त्यांचे सुपुत्र तन्मय व तनिष यादव, विद्यमान उपनगराध्यक्षा रिया उभारे यांचे पती तथा माजी उपनगराध्यक्ष रत्नाकर भारे, माजी उपनगराध्यक्ष संदीप खरंगटे, दिलीप जाधव, माजी नगरसेवक जयंत बोडेरे, हेमंत शेट, नगरसेक राजेश मेहता यांच्या पत्नी तथा माजी उपनगराध्यक्षा निलम मेहता व सुपुत्र पंकज मेहता, बाजार समितीचे संजय पंदेरे, तसेच कपिल गायकवाड, दिनेश रातवडकर, ममता थोरे-शेठ यांच्यासह शेकडो कार्यकर्ते व ग्रामस्थांनी शिवसेनेत प्रवेश केला. यावेळी जेष्ठ नेते विजयराज खुले, दिलीप भोईर, अँड. महेंद्र माणकर, नीलिमा घोसाळकर, दिलीप सांगळे, नितीन दसवते, विलास शिंदे आदी मान्यवर उपस्थित होते.
नेत्यांचे जोरदार निशाणे आणि राजकीय संघर्ष
पक्ष प्रवेश सोहळ्यादरम्यान महायुतीमधील अंतर्गत वाद आणि स्थानिक राजकारण उघडपणे समोर आले.
पालकमंत्री भरत गोगावले: त्यांनी राष्ट्रवादी काँग्रेसमधील कथित एकाधिकारशाहीवर कडाडून टीका केली. राजू साबळे यांनी सर्वांना सोबत घेऊन काम केले असते तर आज राष्ट्रवादीवर ही वेळ आली नसती, असे सांगत स्वतःला सर्वश्रेष्ठ समजून संघटना चालवता येत नाही, असे गोगावले यांनी स्पष्ट केले. तसेच माणगाव नगरपंचायतीसाठी १५ कोटी आणि पाणीपुरवठ्यासाठी २ कोटींचा निधी उपलब्ध करून दिल्याचे सांगत त्यांनी विकासात्मक मुद्द्यांवर भर दिला.
आमदार महेंद्र दळवी: त्यांनी खासदार सुनील तटकरे आणि त्यांच्या कुटुंबीयांच्या कार्यपद्धतीवर घराणेशाहीचा गंभीर आरोप केला. रायगडमधील सत्तास्थाने एकाच कुटुंबाभोवती केंद्रित झाली असून, सर्वसामान्य कार्यकर्त्यांना संधी कुठे उरली आहे, असा सवाल त्यांनी केला. तसेच आगामी निवडणुकांमध्ये शिवसेना स्वतःच्या ताकदीवर मैदानात उतरेल, असा इशाराही त्यांनी दिला.
विकास गोगावले: जिल्हा परिषद सदस्य विकास गोगावले यांनी ॲड. राजीव साबळे यांच्यावर निशाणा साधत, ते स्वतःला माणगाव नगरपंचायतीचे हुकूमशहा समजायचे, असा घणाघात केला. आता शिवसेनेचे सर्व वाघ एकत्र आल्यामुळे विरोधकांना पळता भुई थोडी होईल, असा विश्वास त्यांनी व्यक्त केला.
माणगावमधील या सत्तासंघर्षात एका बाजूला पक्षप्रवेशाद्वारे शिवसेनेने आपले शक्तिप्रदर्शन केले असून, स्थानिक पातळीवर मित्रपक्षांमधील उघड झालेली नाराजी आगामी नगरपंचायत आणि स्थानिक स्वराज्य संस्थांच्या निवडणुका अत्यंत रंगतदार होणार असल्याचे संकेत देत आहे. 
