रायगड: राजकारणात काहीही शक्य! भाजपचे स्पष्ट बहुमत असतानाही खालापूरच्या चौक ग्रामपंचायतीत उबाठाचा उपसरपंच

​रायगड: राजकारणात कधी काय घडेल आणि कोणती नवी समीकरणे समोर येतील, याचा नेम नसतो. याचा प्रत्यय रायगड जिल्ह्यातील खालापूर तालुक्यातील चौक ग्रामपंचायतीमध्ये आला आहे. येथे भारतीय जनता पक्षाचे स्पष्ट बहुमत आणि भाजपचाच सरपंच असतानाही, शिवसेना (उद्धव बाळासाहेब ठाकरे) पक्षाचे निखिल मालुसरे यांची उपसरपंचपदी बिनविरोध निवड झाली आहे. भाजपच्या मदतीने घडलेल्या या अनपेक्षित राजकीय घडामोडीमुळे संपूर्ण परिसरात चर्चांना उधाण आले आहे.

​संख्याबळ डावलून राजकीय उलथापालथ

​चौक ग्रुप ग्रामपंचायतीमध्ये एकूण १८ लोकप्रतिनिधींचे संख्याबळ आहे, ज्यामध्ये १७ सदस्यांसह एक थेट निवडून आलेला सरपंच समाविष्ट आहे. या सत्तेच्या समीकरणात भाजपचे तब्बल १४ सदस्य आहेत, तर उबाठा गटाचे केवळ तीन सदस्य आहेत.

​एवढे मोठे स्पष्ट बहुमत असतानाही उपसरपंचपदाची धुरा उबाठा गटाकडे गेल्याने राजकीय वर्तुळात आश्चर्य व्यक्त होत आहे. नुकत्याच पार पडलेल्या जिल्हा परिषद आणि पंचायत समिती निवडणुकांमध्ये भाजप व उबाठा यांच्यात तीव्र संघर्ष पाहायला मिळाला होता. मात्र, ग्रामपंचायतीच्या या पातळीवर झालेली ही निवड पूर्णपणे वेगळेच चित्र समोर आणत आहे.

​निखिल मालुसरे यांची बिनविरोध निवड

​उपसरपंचपदी निवड झालेले निखिल मालुसरे हे उबाठाचे युवा तालुका पदाधिकारी असून, त्यांची ओळख एक कट्टर शिवसैनिक म्हणून आहे. त्यांच्या सामाजिक कार्याची दखल घेऊन त्यांना ही संधी देण्यात आली की यामागे भविष्यातील कोणती मोठी राजकीय गणितं दडलेली आहेत, याबाबत आता तर्कवितर्क लढवले जात आहेत.

​या अनपेक्षित युतीमुळे भाजपच्या काही स्थानिक सदस्यांमध्ये नाराजी असल्याची चर्चा आहे, तर उबाठाच्या गोटातूनही संमिश्र प्रतिक्रिया उमटत आहेत. ही निवड स्थानिक पातळीवरील तडजोड आहे की आगामी राजकारणाची नांदी, हे येणारा काळच ठरवेल.