रायगडमध्ये महायुतीत जुंपली! “महेंद्र थोरवे घटकेत घोड्यावर तर घटकेत गाढवावर”; अनिकेत तटकरेंचा घणाघाती पलटवार

रायगड (विशेष प्रतिनिधी)

रायगड जिल्ह्यातील कर्जत-खालापूर मतदारसंघातील प्रकल्पांवरून महायुतीतील घटक पक्ष असणाऱ्या शिवसेना (शिंदे गट) आणि राष्ट्रवादी काँग्रेस (अजित पवार गट) यांच्यात राजकीय वाद विकोपाला गेला आहे. शिवसेना आमदार महेंद्र थोरवे यांनी खासदार सुनील तटकरे यांच्यावर केलेल्या गंभीर आरोपांना राष्ट्रवादी काँग्रेसचे आमदार अनिकेत तटकरे यांनी सडेतोड प्रत्युत्तर दिले असून, "महेंद्र थोरवे हे घटकेत घोड्यावर तर घटकेत गाढवावर असणारे व्यक्तिमत्त्व आहे," अशा घणाघाती शब्दांत त्यांच्यावर पलटवार केला आहे.

कर्जत-खालापूरमध्ये केंद्र व राज्य सरकारचे 'टोरंट' आणि इतर प्रकल्प प्रस्तावित आहेत. या प्रकल्पांना राष्ट्रवादी काँग्रेसकडून विरोध केला जात असल्याचा आरोप करत आमदार महेंद्र थोरवे यांनी खासदार सुनील तटकरे आणि राष्ट्रवादीचे रायगड जिल्हाध्यक्ष सुधाकर घारे यांच्यावर निशाणा साधला होता. "शासकीय प्रकल्प नको असतील तर राष्ट्रवादीने आधी महायुतीतून बाहेर पडावे. पर्यावरणपूरक टोरंट प्रकल्पाला विरोध करणाऱ्या तटकरेंची खालापूर तालुक्यात दारूची फॅक्टरी असून, त्यात त्यांच्या मुलाची व साडूची भागीदारी आहे. तटकरेंनी ही एनओसी जबरदस्तीने मिळवली असून हा कारखाना बंद पाडू," असा इशारा थोरवेंनी दिला होता.

आमदार थोरवे यांच्या या विधानाचा समाचार घेताना आमदार अनिकेत तटकरे म्हणाले, "सुनील तटकरे आणि सुधाकर घारे यांच्यावर बोलल्याशिवाय आमदार थोरवे यांचा दिवस जात नाही अन् त्यांना झोपही लागत नाही. खासदार सुनील तटकरे हे थोरवेंसारखे मिटिंग घेऊन सेटिंग करणारे नाहीत. आमची गोदरेज किंवा टाटा कंपनीसोबत कोणतीही चर्चा झालेली नाही."

महायुतीतील या दोन प्रमुख नेत्यांमधील शाब्दिक युद्धामुळे रायगड जिल्ह्यातील राजकीय वातावरण चांगलेच तापले असून सत्ताधारी पक्षात निर्माण झालेली ही दरी उघड झाली आहे.