खोपटा पुलावर रिक्षाचालकांची मनमानी; वाहतूक पोलिसांच्या दुर्लक्षामुळे नागरिक हैराण

उरण (अनंत नारंगीकर)

प्रशासन व वाहतूक पोलिसांच्या दुर्लक्षामुळे उरण तालुक्यात रिक्षाचालकांची मुजोरी दिवसेंदिवस वाढत आहे. खोपटा पुलावर दररोज रिक्षाचालकांच्या मनमानीमुळे वाहतुकीची मोठी कोंडी होत असून बेशिस्त वाहतुकीचे दृश्य पाहायला मिळत आहे. याचा नाहक त्रास प्रवासी, रुग्ण आणि विद्यार्थ्यांना सहन करावा लागत आहे.

मिळालेल्या माहितीनुसार, उरण तालुक्यातील सुमारे २५ टक्के सुशिक्षित बेरोजगार तरुणांनी अधिकृत आरटीओ परवाना (परमिट) मिळवून प्रामाणिकपणे रिक्षा व्यवसाय सुरू केला आहे. मात्र, दुसरीकडे सुमारे २० टक्के लोकांनी नोकरी-व्यवसायाला जोडधंदा म्हणून नियमांची पायमल्ली करत आरटीओ अधिकाऱ्यांची दिशाभूल करून परवाने लाटले असल्याचे निदर्शनास येत आहे.

वाहतूक पोलीस आणि प्रशासनाकडून नियमांचे उल्लंघन करणाऱ्यांवर कोणतीही कडक व सातत्यपूर्ण कारवाई होत नसल्यामुळे अशा मुजोर रिक्षाचालकांचे धाडस वाढले आहे. खोपटा पुलावर अनधिकृतपणे रिक्षा उभ्या करणे, प्रवाशांसाठी मध्येच गाड्या थांबवणे यांमुळे दररोज वाहतूक कोंडी निर्माण होत आहे.

बेकायदेशीरपणे आणि नियम मोडून वाहतूक कोंडीस कारणीभूत ठरणाऱ्या बेशिस्त रिक्षाचालकांवर आरटीओ विभाग आणि वाहतूक पोलिसांनी तात्काळ कठोर दंडात्मक कारवाई करावी, अशी जोरदार मागणी स्थानिक नागरिक व प्रवाशांकडून केली जात आहे.