गुरुवार, १९ नोव्हेंबर २०२६ | सामान्य जनतेचे हक्काचे व्यासपीठ
ब्रेकिंग न्यूज

रोह्यातील पक्षप्रवेश ही रायगडमधील नव्या राजकीय संघर्षाची नांदी ठरणार : मंत्री भरत गोगावले

रोहा येथील भव्य पक्षप्रवेश सोहळ्यात राष्ट्रवादी काँग्रेसच्या स्थानिक नेत्यांसह शेकडो कार्यकर्त्यांनी शिवसेनेत (शिंदे गट) प्रवेश केला. हा पक्षप्रवेश केवळ पक्षांतर नसून रायगडच्या राजकारणात नव्या संघर्षाची नांदी ठरेल, असा थेट इशारा मंत्री भरतशेठ गोगावले यांनी विरोधकांना दिला.
मुख्य संपादक
मंगळवार, १७ नोव्हेंबर २०२६ | दुपारी ५:४९ ● ५३२ वाचन (Views)
रोह्यातील पक्षप्रवेश ही रायगडमधील नव्या राजकीय संघर्षाची नांदी ठरणार : मंत्री भरत गोगावले
जाहिरात (Advertisement)

रोह्यात शिवसेनेचे मोठे शक्तिप्रदर्शन; राष्ट्रवादी काँग्रेसचे स्थानिक नेते व शेकडो कार्यकर्त्यांचा शिंदे गटात प्रवेश

धाटाव (शशिकांत मोरे) | दि. १७ नोव्हेंबर

"रोह्यातील हा पक्षप्रवेश केवळ पक्षांतर नसून रायगडच्या राजकारणात नव्या राजकीय संघर्षाची नांदी ठरणार आहे. आम्ही आजवर कोणतीही निवडणूक हरलेलो नाही; माणसाची नियत आणि नीतिमत्ता चांगली असेल तर त्याचा कोणी पराभव करू शकत नाही. यापुढे रायगडमध्ये भगवे वादळ घोंगावणार आहे," असे प्रतिपादन राज्याचे मंत्री भरतशेठ गोगावले यांनी रोहा येथील पक्षप्रवेश सोहळ्यात केले.

जाहिरात (Advertisement)
सोमवार, दि. १६ नोव्हेंबर रोजी सायंकाळी ७ वाजता रोहा येथील ऐतिहासिक राम मारुती चौकात शिवसेनेच्या वतीने भव्य पक्षप्रवेश सोहळ्याचे आयोजन करण्यात आले होते. या सोहळ्यात राष्ट्रवादी काँग्रेसचे पेण विधानसभा मतदारसंघाचे कार्याध्यक्ष व सामाजिक कार्यकर्ते प्रमोद म्हसकर, रोहा पंचायत समितीचे सदस्य सुरेश मगर, सामाजिक कार्यकर्ते प्रदीप (आप्पा) देशमुख आणि जिल्हा परिषदेचे माजी सदस्य बी. डी. पाटील यांच्यासह शेकडो कार्यकर्त्यांनी उपमुख्यमंत्री एकनाथ शिंदे यांच्या नेतृत्वावर विश्वास ठेवत शिवसेनेत जाहीर प्रवेश केला. मंत्री भरत गोगावले आणि आमदार महेंद्र दळवी यांच्या हस्ते शाल देऊन त्यांचे पक्षात स्वागत करण्यात आले.

विकास कामांवरून गोगावलेंची टीका

आपल्या भाषणात मंत्री भरत गोगावले यांनी विरोधकांवर जोरदार निशाणा साधला. "महायुतीच्या सरकारमध्ये मंत्रिपदाची संधी असताना मी दीड वर्ष त्याग केला. आम्ही बोलतो ते करतो म्हणून लोक आमच्या पाठीशी उभे राहतात. सभेला जमलेला हा प्रचंड जनसागर पाहून विरोधकांनी आत्मपरीक्षण करण्याची गरज आहे," असे गोगावले म्हणाले. प्रवेश केलेल्या सर्व नेत्यांच्या आणि कार्यकर्त्यांच्या विश्वासाला तडा जाऊ देणार नाही, अशी ग्वाहीदेखील त्यांनी यावेळी दिली.

आमदार महेंद्र दळवी व विकास गोगावले यांचा इशारा

यावेळी आमदार महेंद्र दळवी यांनी रोहा नगरपालिकेच्या मागील निवडणुकीचा संदर्भ देत, "आता 'रोहा बोलतोय'" असे सांगत आगामी काळात संपूर्ण जिल्ह्यात शिवसेना मजबूत करण्याचा निर्धार व्यक्त केला. तर युवा नेते विकास गोगावले यांनी जिल्ह्यात सलग तीन दिवसांपासून सुरू असलेल्या पक्षप्रवेशाचा उल्लेख करत, "पक्षाला क्रमांक एकवर नेण्यासाठी कार्यकर्त्यांना ताकद दिली जाईल. आगामी काळात श्रीवर्धनचा आमदार आणि रायगडचा खासदारही शिवसेनेचाच असेल," असा विश्वास व्यक्त केला.

प्रवेशकर्त्यांनी व्यक्त केली नाराजी

पक्षात प्रवेश करण्यापूर्वी प्रमोद म्हसकर, सुरेश मगर आणि बी. डी. पाटील यांनी आपल्या पूर्वीच्या पक्षातील कार्यपद्धतीवर तीव्र नाराजी व्यक्त केली. "रोह्याच्या औद्योगिक वसाहतीत गेल्या ४० वर्षांत नवीन कारखाने न आल्याने रोजगाराचा प्रश्न गंभीर झाला आहे, तसेच शेतीसाठी पाण्याचे नियोजन नाही. हे प्रश्न सोडवण्यासाठी आणि कार्यकर्त्यांना न्याय मिळवून देण्यासाठी आम्ही शिवसेनेत प्रवेश करत आहोत," असे प्रमोद म्हसकर यांनी सांगितले. सुरेश मगर आणि बी. डी. पाटील यांनीही पूर्वीच्या पक्षात आश्वासने पाळली गेली नसल्याचा आरोप करत पेण आणि रोहा परिसरात शिवसेना बळकट करण्याची ग्वाही दिली. याप्रसंगी विजयराज खुळे आणि जितेश मुंढे यांनीही आपली मनोगते व्यक्त केली.

या कार्यक्रमाला प्रमोद घोसाळकर, अनिल नवगणे, ज्ञानदेव पवार, संतोष पोटफोडे, उदेश वाडकर, अमित उकडे, संदेश मोरे, अशोक धोत्रे, माजी उपनगराध्यक्षा शिल्पा धोत्रे, पूजा पोटफोडे यांच्यासह जिल्ह्यातील शिवसेनेचे पदाधिकारी, युवा सेना कार्यकर्ते आणि महिला मोठ्या संख्येने उपस्थित होत्या. राष्ट्रवादी काँग्रेसचे प्रदेशाध्यक्ष खासदार सुनील तटकरे यांच्या प्रभावक्षेत्रात झालेल्या या पक्षप्रवेशामुळे आगामी स्थानिक स्वराज्य संस्थांच्या निवडणुकांच्या पार्श्वभूमीवर जिल्ह्यातील राजकीय समीकरणे बदलण्याची चिन्हे असून, यावर राष्ट्रवादी काँग्रेसकडून काय प्रतिक्रिया येते, याकडे राजकीय वर्तुळाचे लक्ष लागले आहे.
जाहिरात (Advertisement)
ही बातमी आवडल्यास नक्की शेअर करा!

संबंधित बातम्या (Related News)

माणगावमध्ये राष्ट्रवादी काँग्रेसचा शक्तिप्रदर्शनाचा जाहीर मेळावा; विविध पक्षांतील नेत्यांच्या पक्षप्रवेशाची दाट शक्यता

माणगाव येथे शुक्रवार, २० नोव्हेंबर रोजी राष्ट्रवादी काँग्रेसचा जाहीर मेळावा आयोजित करण्यात आला असून, यामध्ये विविध पक्षांतील नेत्यांचा पक्षप्रवेश होणार आहे. तसेच खासदार सुनील तटकरे यांच्या उपस्थितीत होणाऱ्या या मेळाव्यात भुयारी गटार योजनेवरून विरोधकांना प्रत्युत्तर दिले जाणार आहे.

उरणमध्ये हातचलाखी करून ८१ वर्षीय वृद्धाची फसवणूक; सव्वा लाखांचे दागिने लांबवले

उरणमधील वहाळ गावात हातचलाखी करून एका ८१ वर्षीय वृद्धाची सव्वा लाखांहून अधिक किमतीची सोन्याची चैन आणि अंगठी लांबवल्याची घटना घडली असून, याप्रकरणी उलवा पोलीस ठाण्यात गुन्हा दाखल करण्यात आला आहे.

दिवेआगरचे सरपंच विजय तोडणकर अडचणीत; निवडणूक प्रतिज्ञापत्रात संपत्ती लपवल्याप्रकरणी गुन्हा दाखल करण्याचे प्रशासनाचे आदेश

दिवेआगर ग्रामपंचायतीचे सरपंच विजय तोडणकर यांच्यावर निवडणूक प्रतिज्ञापत्रात संपत्ती लपवल्याप्रकरणी श्रीवर्धन तहसील कार्यालयाने गुन्हा दाखल करण्याचे आदेश दिले आहेत. माणगाव हद्दीतील फ्लॅटची माहिती लपवल्याने रायगडच्या राजकीय वर्तुळात खळबळ उडाली आहे.

अलिबागमध्ये वाहतूक कोंडीमुळे रुग्णवाहिका रखडल्याने चिमुरड्याचा मृत्यू

अलिबाग-बेलकडे मार्गावर सुरू असलेल्या रस्त्याच्या कामामुळे झालेल्या भीषण वाहतूक कोंडीत रुग्णवाहिका अडकल्याने उपचारास उशीर झाला. यामुळे फुगा गिळल्याने प्रकृती गंभीर झालेल्या बामणगाव येथील अवघ्या १ वर्ष ८ महिन्यांच्या आरांश ठाकूर या चिमुरड्याचा दुर्दैवी मृत्यू झाला असून, प्रशासनाच्या ढिसाळ नियोजनाविरोधात तीव्र संताप व्यक्त होत आहे.