सलीम शेख
माणगाव : शहरातील मुंबई-गोवा महामार्गालगत रेल्वे स्टेशनच्या जवळ असलेल्या अनमोल आईस्क्रीम कॉर्नर दुकानाजवळ दोन अनोळखी इसमांनी चाकूचे वार करून अनोळखी इसमाचा खून केल्याची घटना घडली आहे.
पोलीस सूत्रांकडून मिळालेल्या माहितीनुसार सविस्तर वृत्त असे की, दि. ११ सप्टेंबर रोजी अनोळखी मयत व अनोळखी दोन आरोपी इसम यांच्यात अनमोल आईस्क्रीम कॉर्नर दुकानासमोर ओट्यावर त्यांचेमध्ये वाद होवून त्याचे रूपांतर मारामारीमध्ये झाले. त्यावेळी आरोपी क्र. १ याने मयत यास कानाखाली मारली. त्यावरुन यातील मयत याने त्याचे खिशातून चाकुसारखे धारधार शस्त्र काढून आरोपी क्र. १ यावर हल्ला करुन चाकुसारखे धारधार शस्त्राचे वार केले. त्यावेळी मयत यास आरोपीत क्र. २ यांनी आवरण्याचा प्रयत्न करत असताना चाकुसारखे धारधार शस्त्राचे मयत याचे शरीराच्या समोरील बाजुस छातीवर, पोटावर दुखापती झाल्या. तसेच मयत याने स्वतःचे डाव्या हाताच्या मनगटावर दुखापती केल्या असताना आरोपी यांनी सदर जखमांमुळे मयत यास मृत्यु येवु शकतो याची जाणिव असताना मयत यास कोणत्याही औषधोपचारीची मदत न देता चाकुसारखे धारधार शस्त्र, चाकुसारखे धारधार शस्त्र पुसलेला कपडा, इतर साहित्य असे घटनास्थळावरुन घेवुन जावुन पुरावा नष्ट केला. या घटनेची नोंद माणगांव पोलीस ठाण्यात करण्यात आली असून पुढील तपास उपविभागीय पोलिस अधिकारी माणगाव पुष्कराज सुर्यवंशी यांच्या मार्गदर्शनाखाली पोलिस निरिक्षक निवृत्ती बोऱ्हाडे करीत आहेत.