अमर मोबाईल शॉपचा मालक अमर केंद्रे याला अटक

कोर्टाने सुनावली १८ तारखेपर्यंत पोलीस कोठडी

विठ्ठल ममताबादे
उरण : तालुक्यातील रहिवासी असणारे अजय विजय पाटील, दीपक अशोक मोरे, रुपाली शैलेश किल्लेकर, सागर शरद वाघमारे, अनिल राजाराम घुटुकडे, जितेंद्र नारायण थळे यांच्यासह इतर अनेक रहिवाशांची लोनच्या (कर्जाच्या) आर्थिक प्रकरणात अमर मोबाईल शॉपचे मॅनेजर सागर कोळी व प्रोपायटर अमर केंद्रे यांनी फसवणूक केली असून वरील सर्व पीडित व्यक्तींनी एकत्र येत उरण तालुक्यातील उरण पोलीस स्टेशनमध्ये संबंधित फसवणूक करणाऱ्या अमर मोबाईल शॉपचे मॅनेजर सागर कोळी व प्रोपायटर अमर केंद्रे यांच्या विरोधात तक्रार दाखल केली होती. शेकडो ग्राहकांची करोडो रुपयांची फसवणूक झाल्याचे या प्रकरणातून समोर आले आहे. त्यामुळे उरणमधील या नवीन आर्थिक फसवणूक प्रकरणामुळे एकच खळबळ माजली आहे. अनेक महिने झाले अमर केंद्रे हा फरार होता. मात्र जागरूक नागरिक व पीडित फसवणूक झालेल्या नागरिकांनी या अन्याया विरोधात वेळोवेळी आवाज उठविल्याने अमर केंद्रे याला अटक करण्यात आली आहे. नागरिकांची फसवणूक केल्याने अमर केंद्रे यांच्यावर २० जून २०२४ रोजी उरण पोलिसांनी गुन्हा नोंदविला आहे. तेव्हापासून अमर केंद्रे फरार होता. मात्र, गुरुवार, दि. १२ सप्टेंबर २०२४ रोजी रात्री ८:३० वाजता अमर केंद्रे याला अटक करण्यात आली आहे. सध्या अमर केंद्रे तुरुंगात आहे. अमर केंद्रे याला कोर्टात हजर केले असून १८ तारखेपर्यंत त्याला पोलीस कोठडी देण्यात आली आहे. अशी माहिती उरण पोलीस ठाण्याचे सहाय्यक पोलीस निरीक्षक शिवाजी महादेव हुलगे यांनी दिली.

अजय विजय पाटील, दीपक अशोक मोरे, रुपाली शैलेश किल्लेकर, सागर शरद वाघमारे, अनिल राजाराम घुटुकडे, जितेंद्र नारायण थळे हे अर्जदार (तक्रारदार) हे उरण येथील कायमस्वरुपी रहिवाशी असुन हे ग्राहक अमर ग्लोबल मोबाईल शॉप, पत्ता कामठा रोड, उरण शहर, ता. उरण, जि. रायगड येथील मॅनेजर सागर कोळी व प्रोप्रायटर अमर केंद्रे यांच्या शॉपमध्ये वारंवार खरेदी विक्री करण्यासाठी जात असल्यामुळे त्यांच्यासोबत सदर ग्राहकांची ओळख झाली होती. त्यानंतर अमर ग्लोबल मोबाईल शॉप येथील मॅनेजर सागर कोळी ह्याने सदर नागरिकांना वेगवेगळ्या तारखेला बोलावून, त्यांना त्यांचे नावे लोन काढण्यासाठी ऑफर दिली व त्यापासुन त्यांना कौटुंबिक खर्चासाठी मदत म्हणुन फायदे मिळतील असे मॅनेजर व प्रोपायटर यांनी ग्राहकांना आमिष दाखविले. तसेच प्रोप्रायटर अमर केंद्रे यांनी सदर लोनबाबत ग्राहकांना आश्वासन दिल्यामुळे ग्राहकांनी मॅनेजर सागर कोळी यांच्या शब्दांवर पुर्णपणे विश्वास ठेवला. ग्राहकांना देखील कौटुंबिक व मुलांच्या खर्चासाठी मदत मिळणार म्हणुन ग्राहकांनी अमर शॉपच्या मॅनेजर व प्रोपायटर यांना लोन काढण्यासाठी परवानगी दिली. तसेच सदर लोनचे हफ्ते मॅनेजर सागर कोळी हा भरणा करेल असे त्यांनी ग्राहकांना सांगितले होते. त्यावेळी प्रोप्रायटर अमर केंद्रे ह्याने देखील सदर लोनबाबत ग्राहकांना तुम्ही लोनचे हप्ते भरू नका आम्ही सर्व लोनचे हप्ते भरू असे आश्वासन देवून गॅरंटी दिली होती. त्यानंतर मॅनेजर सागर कोळी ह्याने ग्राहकांच्या नावाने ऑनलाईन लोन काढले आहे. असे प्रकार शेकडो नागरिकांच्या बाबतीत घडले. परंतु मागील काही महिन्यांपासुन अमर ग्लोबल मोबाईल शॉप येथील मॅनेजर सागर कोळी याने ग्राहकांच्या नावाने लोन काढले असुन सदर लोनच्या हप्त्याची रक्कम त्याने भरलेली नाही. त्यामुळे ग्राहकांना सदर प्रकरणात मोठ्या प्रमाणामध्ये आर्थिक नुकसान सहन करावे लागत आहे.

सदर लोनसाठी आश्वासन देवून, अमर ग्लोबल मोबाईल शॉपचा प्रोप्रायटर अमर केंद्रे याने शेकडो सामान्य नागरीकांची/ग्राहकांची फसवणुक करुन करोडो रुपयांची अफरातफर करुन फरार झाला आहे. अमर ग्लोबल मोबाईल शॉप येथील मॅनेजर सागर कोळी व प्रोप्रायटर अमर केंद्रे ह्यांनी ग्राहकांचा विश्वासघात करुन अनेक सर्वसामान्य ग्राहकांची पुर्णपणे फसवणुक केली आहे. त्यांच्या फसवणुकीमुळे ग्राहकांना खुप मोठया प्रमाणामध्ये आर्थिक नुकसान सहन करावा लागला आहे. तक्रारदारांनी नोंदविलेल्या तक्रार व पुरावे सादर केल्यानंतर पोलीस प्रशासनाने प्रोप्रायटर अमर केंद्रे याच्या विरुध्द कायदेशिर कार्यवाही केली आहे. फसवणूक झालेल्या ग्राहकांना नुकसान भरपाई मिळावी अशी मागणी अजय विजय पाटील, दीपक अशोक मोरे, रुपाली शैलेश किल्लेकर, सागर शरद वाघमारे, अनिल राजाराम घुटुकडे, जितेंद्र नारायण थळे तसेच अनेक तक्रारदारांनी पोलीस प्रशासनाकडे केली आहे.

नागरिकांना फसवून अमर केंद्रे व सागर कोळी यांनी ग्राहकांना मोबाईल दिले म्हणून बँकेला कळविले व ग्राहकांच्या नावावर लोन केले. नंतर बँकेने लोन घेतले आता लोन फेडा हप्ते भरा असा तगादा ग्राहकांच्या पाठीमागे लावला. नाईलाजाने फसवणूक झालेल्या नागरिकांना विनाकारण खोट्या लोनचे पैसे बँकेत भरावे लागले आहेत. हप्ते भरावे लागले. या सर्व घटनेला अमर मोबाईल शॉपचे प्रोपायटर अमर केंद्रे व मॅनेजर सागर कोळी जबाबदार आहे. या दोघांना कठोरात कठोर शिक्षा करावी. बँकेचे सर्व लोन माफ करून ग्राहकांनी भरलेले हप्ते नागरिकांना परत करावेत व फसवणूक झालेल्या नागरिकांना न्याय द्यावा.
-अजय विजय पाटील
फसवणूक झालेली व्यक्ती, उरण

आर्थिक फसवणूक करणारा अमर ग्लोबल मोबाईल शॉपचा प्रोपायटर अमर केंद्रे गेली ३ महिने फरार होता. सतत जागा बदलून, स्थळ बदलून तसेच नवनवीन सीमकार्ड वापरून तो पोलिसांना चकवा देत होता. सीमकार्ड वापरायचे व ते फेकून द्यायचे. मात्र त्याच्या लोकेशनवरून रेवदंडा येथे त्याला पकडले व ताब्यात घेतले. त्याला कोर्टात हजर केले असून १८ तारखेपर्यंत पोलीस कोठडी देण्यात आली आहे. याप्रकरणात अजून कोणाकोणाचे हात आहेत किंवा सहभाग आहे याचा पुढील तपास चालू आहे.
-शिवाजी महादेव हुलगे
सहाय्यक पोलीस निरीक्षक उरण