क्रीडा प्रतिनिधी
रायगड : महाराष्ट्र क्रिकेट असोसिएशन आयोजित पंधरा वर्षाखालील मुलींच्या निमंत्रित आंतरजिल्हा निवड चाचणी एकदिवसीय क्रिकेट स्पर्धेतील साखळी फेरीचा दुसरा सामना काल पुणे येथील विस्डॉम क्रिकेट अकॅडमीच्या मैदानावर रायगड विरूद्ध सांगली ह्या संघांमध्ये खेळला गेला. त्यामध्ये रायगड जिल्ह्यातील महाडच्या रोशनी पारधी हिने धुवाँधार फलंदाजी करत स्पर्धेतील लागोपाठ दुसरे शतक झळकावत रायगडच्या संघाला विजय मिळवून दिला आहे. अवघ्या ८१ चेंडूंमध्ये २४ चौकराच्या सहाय्याने तिने नाबाद ११९ धावा काढल्या. ह्याआधी हिंगोली विरूद्ध तिने शतक केले आहे.
सांगली जिल्हा क्रिकेट असोसिएशनच्या संघाने प्रथम फलंदाजी करताना ३५ षटकांत ८ गडी गमावत १९० धावा धावफलकावर नोंदवल्या. सांगली संघाची सलामीची फलंदाज कृष्ण सागरे हिने एका बाजूने संयमी फलंदाजी करत ११७ चेंडूंमध्ये १११ धावा काढून शतक झळकावले. तिला श्रेया जगदाळे हिने दुसऱ्या बाजूने साथ देत ३२ धावा काढल्या. रायगडकडून निषिता विठलानी हिने ४, रोशनी पारधी २ तर स्तुती विठलानी हिने १ फलंदाज बाद केला. १९० धावसंख्येला उत्तर देताना रायगड संघाची कर्णधार रोशनी पारधी हिने चौफेर टोलेबाजी करत स्पर्धेतलं लागोपाठ दुसरं शतक झळकावलं. अवघ्या ८१ चेंडूंमध्ये नाबाद ११९ धावा तिने केल्या. त्यामध्ये २४ चौकारांचा समावेश होता. मधल्या फळीत अनिश्का वर्मा व स्वरा जगताप यांनी प्रत्येकी १५ धावा काढून संघाला योगदान दिले. २८व्या षटकात रायगडच्या संघाने सामना ४ गडी राखून जिंकला. रोशनी पारधी हिने स्पर्धेत लागोपाठ दोन शतकं झळकावत रायगडच्या संघाचे अस्तित्व स्पर्धेत कायम ठेवले आहे.
रायगडच्या मुलींच्या विजयाबद्दल जिल्हा क्रिकेट असोसिएशनचे अध्यक्ष अनिरुद्ध पाटील, सचिव प्रदिप नाईक, सहसचिव बशीर चिचकर, सर्व सदस्य, संघ प्रशिक्षक विनय पाटील, संघ व्यवस्थापक प्रज्ञा सकपाळ, रोशनी पारधीचे प्रशिक्षक आवेश चिंचकर यांनी संघाचे अभिनंदन केले आहे.