अभय पाटील
बोर्ली पंचतन : लोकसभेला आम्ही महायुतीचा धर्म पाळून सुनील तटकरे यांना विजयी करून देण्यात मोलाचा वाटा उचलला असे असताना महायुतीमध्ये तेथील विद्यमान आमदार असणाऱ्या पक्षाला ह्यावेळेस देखील उमेदवार देण्याचा निर्णय असताना देखील राष्ट्रवादी काँग्रेस पक्षाकडून कर्जत मतदार संघामध्ये राष्ट्रवादी काँग्रेस पक्ष सुधाकर घारेंना उमेदवार म्हणून मागणी करीत असेल तर आम्ही देखील श्रीवर्धन मतदार संघामध्ये शिवसेना पक्षाचा उमेदवार उभा करू असे वक्तव्य शिवसेना जिल्हाप्रमुख प्रमोद घोसाळकर यांनी दिवेआगर येथे आयोजित पत्रकार परिषदेमध्ये केले.
विधानसभा 2024 च्या निवडणुकीचे बिगुल वाजले असल्याने मतदार संघामध्ये उमेदवार कोण असेल याचा तिढा काही मतदार संघामध्ये सुटलेला दिसत नाही. यातच रायगड जिल्ह्यातील महायुतीमधील मतभेद समोर येत आहेत. शिवसेना पक्षाकडून आज दिवेआगर येथील नीलम रिसॉर्ट येथे दक्षिण रायगड जिल्हा प्रमुख प्रमोद घोसाळकर यांनी पत्रकार परिषद घेतली यापत्रकार परिषदेस रोहा तालुकाप्रमुख मनोज शिंदे, संपर्क प्रमुख सचिन पाटेकर, श्रीवर्धन तालुकाप्रमुख सुरेश मिरगळ उपस्थित होते.
यावेळी प्रमोद घोसाळकर म्हणाले की, श्रीवर्धन हा शिवसेना पक्षाचा बालेकिल्ला आहे. तत्कालीन आमदार शाम सावंत हे शिवसेनेकडून 3 वेळा आमदार त्यानंतर तुकाराम सुर्वे हे एकवेळा निवडून आले असल्याने आताच्या विधानसभेला आम्ही आमच्या पक्षाचा उमेदवार उभा करणार आहोत. महायुतीमध्ये झालेल्या निर्णयानुसार मतदार संघामध्ये विद्यमान आमदार ज्या पक्षाचा असेल त्या पक्षाचा उमेदवार असेल, परंतु कर्जतमध्ये शिवसेना शिंदे गटाचे विद्यमान आमदार महेंद्र थोरवे असताना देखील राष्ट्रवादी काँग्रेस पक्षाकडून सुधाकर घारे यांना उमेदवारी मिळण्यासाठी प्रयत्न सुरू आहेत. लोकसभेला आम्ही युतीचा धर्म पाळला परंतु राष्ट्रवादी काँग्रेस प्रदेशाध्यक्ष सुनील तटकरे यांनी खासदार निवडून आल्यानंतर युतीचा धर्म पाळला नाही. शासकीय निधी वाटपामध्ये शिवसेना पक्षाला विश्वासात घेतले जात नाही. तळा मध्ये पाणी योजना आणण्यासाठी शिवसैनिकानी देखील मेहनत घेतली परंतु उदघाटन करताना आम्हाला डावलल गेलं. एकंदरीत आम्हाला कोणत्याही प्रकारे विश्वासात घेतले जात नाही. कर्जत मतदार संघामध्ये अपक्ष उमेदवार म्हणुन जरी घारे उभे राहत असतील तर आम्ही देखील अपक्ष उमेदवार देऊ असेही प्रमोद घोसाळकर म्हणाले.