१९४ महाड विधानसभा मतदारसंघात २८ ऑक्टोबरला शिवसेना ठाकरे गट उमेदवारी अर्ज दाखल करणार!

स्नेहल जगताप विरुद्ध गोगावले रंगतदार लढत होणार!

मिलिंद माने
महाड : १९४ महाड विधानसभा मतदारसंघातून शिवसेना उद्धव बाळासाहेब ठाकरे गटाच्या महाडच्या माजी नगराध्यक्ष स्नेहल जगताप या २८ऑक्टोबर रोजी विधानसभा निवडणुकीचा उमेदवारी अर्ज दाखल करणार असून महाड विधानसभा मतदारसंघात शिवसेना विरुद्ध शिवसेना अशीच रंगतदार लढत होणार असून या लढतीकडे महाराष्ट्रातील राजकीय निरीक्षकांचे लक्ष लागून राहिले आहे.

राज्यातील शिवसेना पक्षात फूट पडल्यानंतर रायगडमधील तिन्ही आमदार शिंदे गटात गेल्याने रायगडमध्ये शिवसेनेत दोन तट पडले. लोकसभा निवडणुकीत याचा प्रत्यय शिवसेनेच्या दोन्ही गटांना आला आहे. रायगड लोकसभा मतदारसंघातून शिवसेनेचे अनंत गीते यांचा पराभव झाला मात्र, मावळ लोकसभा मतदारसंघातून शिवसेना शिंदे गटाचे श्रीरंग बारणे हे तिसऱ्यांदा खासदार झाले. मात्र, मावळ लोकसभा मतदारसंघातील कर्जत, खालापूर, पनवेल व उरण या तीन विधानसभा मतदारसंघाचा या लोकसभा मतदारसंघात समावेश आहे. त्यापैकी कर्जत-खालापूर मतदार संघातील विद्यमान आमदार महेंद्र थोरवे यांनी शिंदे गटाची साथ धरल्याने लोकसभा निवडणुकीत श्रीरंग बारणे यांना त्याचा फायदा झाला. मात्र, लोकसभेनंतर रायगडची विधानसभेची समीकरणे मात्र बदलणार असल्याची चर्चा रायगडमधील ग्रामीण भागातील मतदारांकडून आत्तापासूनच चर्चिली जात आहेत.

रायगड जिल्ह्यातील महाड, अलिबाग व कर्जत खालापूर या तीन विधानसभा मतदारसंघातील शिवसेनेच्या आमदारांनी उद्धव बाळासाहेब ठाकरे यांची साथ सोडून शिंदे गटात गेल्याने या गद्दार आमदारांना धडा शिकवण्याचा निर्णय रायगड जिल्ह्यातल्या तिन्ही विधानसभा मतदारसंघातील जनतेने घेतला असल्याचे बोलले जात आहे. मात्र, विधानसभा निवडणुकीत याची गणिते काय असणार आहेत हे विधानसभा निवडणुकीचे उमेदवारी अर्ज दाखल केल्यानंतरच व उमेदवारी अर्ज मागे घेतल्यानंतर रायगड जिल्ह्यातील विधानसभेची समीकरणे ठरणार आहेत.

छत्रपती शिवाजी महाराजांच्या पदस्पर्शाने पावन झालेल्या महाड विधानसभा मतदारसंघातील विधानसभा निवडणुकीची रणनीती ही राज्याच्या केंद्रस्थानी असणार असल्याचे संकेत संपूर्ण राज्यातून चर्चिले जात आहेत. त्यामुळे १९४ महाड विधानसभा मतदारसंघातील लढत ही रंगतदार ठरणार आहे. शिवसेना उद्धव बाळासाहेब ठाकरे गटाच्या महाडच्या माजी नगराध्यक्ष व स्वर्गीय माजी आमदार माणिकराव जगताप यांच्या कन्या स्नेहल माणिकराव जगताप-कामत या २८ ऑक्टोबर रोजी महाड विधानसभा मतदारसंघातून शिवसेना उद्धव बाळासाहेब ठाकरे गटाच्या विधानसभेच्या उमेदवारीचा अर्ज दाखल करणार आहेत.

महाड, माणगाव, पोलादपूर येथून शिवसैनिकांची अलोट गर्दी होणार!

१९४ महाड विधानसभा मतदार संघातून २८ ऑक्टोबर रोजी शिवसेना उद्धव बाळासाहेब ठाकरे गटाच्या स्नेहल माणिकराव जगताप-कामत या उमेदवारी अर्ज दाखल करणार असल्याने महाडमधील जुन्या व ज्येष्ठ शिवसैनिकांमध्ये आनंदाचे वातावरण पसरले असून महाड, माणगाव व पोलादपूर येथून गाव व वाड्यांमधून हजारो शिवसैनिक महाडमध्ये दाखल होणार आहेत. एकंदरीत उमेदवारी अर्ज भरल्यानंतर महाड विधानसभा मतदारसंघात शिवसैनिकांमध्ये मोठ्या प्रमाणावर उत्साह संचारणार असून पहिल्यांदाच कोकणातील महाड विधानसभा मतदारसंघातून स्नेहल माणिकराव जगताप-कामत या लाडक्या बहिणीला विधानसभेत पाठवण्यासाठी १९४ महाड विधानसभा मतदारसंघातील शिवसैनिक व महिला सज्ज झाल्याचे चित्र गाव व ग्रामीण भागातील वाड्यावाड्यांवर पाहण्यास मिळत आहे.

एकंदरीत महाड विधानसभा मतदारसंघाची निवडणूक ही न भूतो न भविष्यती अशी ऐतिहासिक ठरणार असल्याचे चित्र आत्तापासूनच पाहण्यास मिळत आहे.