रत्नागिरी : कोकणात चिपळूण येथे राष्ट्रवादीचे नेते माजी आमदार रमेश कदम यांना शिवसेना नेते पालकमंत्री उदय सामंत यांनी थेट शिवसेनेत येण्याची ऑफर दिल्याने येथे काही दिवसात राष्ट्रवादी काँग्रेसमध्ये मोठा भूकंप होण्याची शक्यता वर्तवली जात आहे. दोन दिवसांपूर्वी चिपळूण दौऱ्यावर आलेल्या उदय सामंत यांनी राष्ट्रवादीचे माजी आमदार रमेश कदम यांची भेट घेऊन त्यांच्याशी खासगीत बंद दाराआड जवळपास पंधरा ते वीस मिनिटं चर्चा केली. यामुळे अनेकांच्या भुवया उंचावल्या आहेत.
पालकमंत्री उदय सामंत यांनी राष्ट्रवादीचे माजी आमदार रमेश कदम यांच्या निवासस्थनी जाऊन भेट घेतली आणि बंद दारआड जवळपास २० मिनिटे चर्चा केली आहे. त्यानंतर प्रसार माध्यमांशी सवांद साधला. माजी आमदार रमेश कदम हे राजकारणातील मार्गदर्शक असून ज्या ज्या वेळी माझ्यावर कटू प्रसंग आले त्या त्यावेळी त्यांचे मार्गदर्शन घेतले आहे. आज त्यांची सदिच्छा भेट घेऊन लवकरच त्यांनी शिवसेनेत आम्हाला मार्गदर्शन करावे, असे त्यांच्या कानात सांगितले आहे. त्याचा ते लवकरात लवकर विचार करतील, असे उदय सामंत म्हणाले.
उदय सामंत आणि रमेश कदम यांच्या भेटीने राजकीय चर्चेला उधाण आले आहे. मात्र यावर रमेश कदम यांनी उत्तर देणे टाळले आहे. येत्या काही दिवसात चिपळूणची राजकीय समीकरणे बदलण्याची शक्यता राजकीय वर्तुळातून व्यक्त होत आहे. दोन दिवसांपूर्वी चिपळूण येथे झालेल्या विविध विकासकामांच्या भूमिपूजन उद्घाटन कार्यक्रमाकरिता उदय सामंत यांच्याबरोबर रमेश कदमही उपस्थित होते.
चिपळूणचे माजी आमदार रमेश कदम हे मोठे प्रस्थ मानलं जातं. त्यांनी यापूर्वी शेतकरी कामगार पक्षाकडून रायगड लोकसभेची निवडणूकही लढवली होती. चिपळूणचे आमदार असताना त्यांनी अनेक महत्त्वाचे प्रश्न मार्गी लावले आहेत. त्यांना मानणारा या परिसरात मोठा वर्ग आहे. त्यामुळे रमेश कदम राजकीय वाटचालीबाबत आता चर्चा सुरू झाल्या आहेत. या पार्श्वभूमीवर कोकणात उत्तर रत्नागिरीत मोठा राजकीय भूकंप होण्याची शक्यता वर्तवली जात आहे