मुंबई: ऑनलाइन औषध विक्री (e-pharmacy) आणि कॉर्पोरेट कंपन्यांच्या मनमानी धोरणांविरोधात ‘ऑल इंडिया ऑर्गनायझेशन ऑफ केमिस्ट्स अँड ड्रगिस्ट्स’ (AIOCD) या संघटनेने आक्रमक पवित्रा घेतला आहे. येत्या २० मे रोजी देशभरातील १२.४ लाखांहून अधिक औषध विक्रेत्यांनी देशव्यापी संपाची हाक दिली आहे.
संपाची मुख्य कारणे आणि केमिस्टच्या तक्रारी:
ई-फार्मसीचा धोका: ऑनलाइन प्लॅटफॉर्म नियमांमधील त्रुटींचा गैरफायदा घेत असल्याचा आरोप संघटनेने केला आहे. यामुळे लहान औषध विक्रेत्यांच्या व्यवसायावर गदा आली असून सुमारे ५ कोटी लोकांच्या उपजीविकेचा प्रश्न निर्माण झाला आहे.
आरोग्याशी खेळ: ऑनलाइन औषध विक्रीमध्ये प्रिस्क्रिप्शनची योग्य पडताळणी होत नाही. एकाच प्रिस्क्रिप्शनवरून अनेकदा औषधे मिळवणे किंवा एआय-आधारित (AI) बनावट प्रिस्क्रिप्शन वापरणे यामुळे सार्वजनिक आरोग्याला धोका निर्माण होत आहे.
ड्रग रेसिस्टन्सची भीती: अँटिबायोटिक्स आणि सवय लावणाऱ्या औषधांच्या अनियंत्रित विक्रीमुळे ‘अँटी-मायक्रोबियल रेझिस्टन्स’ सारख्या गंभीर समस्या वाढू शकतात, असा इशारा केमिस्टने दिला आहे.
असमानी स्पर्धा: मोठ्या कॉर्पोरेट कंपन्या प्रचंड सवलती (Discounts) देऊन बाजारपेठ काबीज करत आहेत. यामुळे ग्रामीण आणि निमशहरी भागातील स्थानिक केमिस्ट दबावाखाली आले आहेत.
AIOCD चे अध्यक्ष जे. एस. शिंदे आणि महासचिव राजीव सिंघल यांनी पंतप्रधान नरेंद्र मोदी यांना निवेदन पाठवून याप्रकरणी तातडीने हस्तक्षेप करण्याची मागणी केली आहे. “हा केवळ व्यवसायाचा प्रश्न नसून रुग्णांच्या सुरक्षेचा विषय आहे,” असे संघटनेने म्हटले आहे.
जर सरकारने २० मे पर्यंत ठोस पावले उचलली नाहीत, तर हा संप अनिश्चित काळासाठी सुरू ठेवण्याचा इशारा औषध विक्रेत्यांनी दिला आहे. यामुळे २० मे रोजी नागरिकांना औषधे मिळवताना अडचणींचा सामना करावा लागू शकतो.