मुंबई : मध्य रेल्वेने पुढील सहा महिन्यांसाठी प्रायोगिक तत्वावर कर्जत, लोणावळा, भिगवण, रोहा, पनवेल, संगमेश्वर रोड, सातारा आणि मसूर या आठ स्थानकांवर काही एक्स्प्रेस गाड्यांना थांबे देण्याचा निर्णय घेतला आहे. त्यामुळे त्या स्थानकावरील प्रवाशांना फायदा होणार आहे.
सातारा रेल्वे स्थानकावर आता हुबळी दादर एक्स्प्रेसला तीन मिनिटे थांबा असणार आहे. तर, भिगवण स्थानकावर दादर पंढरपूर एक्स्प्रेसला दोन मिनिटे थांबा देण्यात आला आहे. कर्जत स्थानकावर डेक्कन एक्स्प्रेसला दोन मिनिटे थांबा असेल. तर नांदेड पनवेल एक्स्प्रेसला एक मिनिट थांबा राहणार आहे. लोणावळा स्थानकावर दादर पंढरपूर एक्स्प्रेस, दादर-साईनगर शिर्डी एक्सप्रेस, हुबळी दादर एक्स्प्रेस, कोल्हापूर-मुंबई महालक्ष्मी एक्स्प्रेस, विशाखापत्तनम-एलटीटी एक्स्प्रेस यांना थांबे देण्यात आले आहेत. तर, रोहा स्थानकावर तिरुवनंतपुरम-एलटीटी नेत्रावती एक्स्प्रेस, दिवा-सावंतवाड़ी एक्स्प्रेस यांना थांबे दिले आहेत.
पनवेल स्थानकावर एलटीटी-एर्नाकुलम दुरंतो एक्स्प्रेस एक मिनिटे थांबा देण्यात आला आहे. या नवीन थांब्याचा निर्णयाची २५ ऑगस्टपासून अंमलबजावणी केली जाणार आहे. त्यामुळे प्रवाशांचा फायदा होणार आहे. जास्तीत जास्त प्रवाशांनी या सुविधेचा लाभ घ्यावा, असे अवाहन रेल्वे प्रशासनाने केले आहे.
रेल्वेत महिलांच्या सुरक्षेसाठी ‘तेजस्विनी’
पुण्यातून धावणाऱ्या रेल्वे गाड्यांमध्ये महिलांच्या सुरक्षेसाठी रेल्वे सुरक्षा दलाने ‘तेजस्विनी’ पथक तयार केले आहे. रेल्वे गाड्यांमध्ये महिलांसोबत प्रवास करून त्यांना सुरक्षा पुरविण्याचे काम हे पथक करणार आहे. या पथकाचे १५ ऑगस्टपासून प्रत्यक्ष काम सुरू झाले आहे.
पुणे रेल्वे विभागातून अनेक लांब पल्ल्याच्या व लोकल गाड्या धावतात. या गाड्यांमधून प्रवास करणाऱ्या महिलांची संख्या मोठी आहे. त्यामुळे रेल्वेतून प्रवास करणाऱ्या महिलांच्या सुरक्षेसाठी पुणे रेल्वे विभागाच्या व्यवस्थापक इंदू दुबे यांच्या मार्गदर्शनाखाली स्वातंत्र्यदिनापासून हे पथक सुरू झाले आहे. या पथकामध्ये रेल्वे सुरक्षा दलाच्या तीन महिला असणार आहेत. या पथकाकडून रेल्वे गाड्यांमध्ये पुणे ते लोणावळ्यापर्यंत प्रवास करून महिला सुरक्षा देण्याचे काम केले जात आहे. ‘डेक्कन’, ‘इंटरसिटी’, ‘सिंहगड एक्स्प्रेस’ आणि दैनंदिन लोकल सेवांमध्ये दररोज महिला प्रवाशांशी पथकातील कर्मचारी व अधिकारी संवाद साधत आहेत.
या पथकावर ‘आरपीएफ’च्या हडपसर ठाण्याच्या निरीक्षक प्रीती कुलकर्णी देखरेख ठेवतील. एकट्याने प्रवास करीत असलेल्या महिला प्रवाशांना आवश्यक सुरक्षा आणि आत्मविश्वास देण्याचे काम पथकाकडून केले जात आहे; तसेच रेल्वेतून प्रवास करताना मौल्यवान वस्तू सुरक्षित ठेवाव्यात. अनोळखी व्यक्तीकडून कोणतेही खाण्याचे पदार्थ स्वीकारू नये, अशा प्रकारची जागरूकता निर्माण करण्याचे काम पथकाकडून केले जात आहे, अशी माहिती रेल्वे प्रशासनाकडून देण्यात आली.