महाड: ‘स्वतः वाढून जेव’ म्हटल्याने संतापला; व्यसनाधीन पतीकडून पत्नीला लाकडी दांडक्याने बेदम मारहाण!

नरवण गावातील घटना; आरोपी पतीविरोधात महाड तालुका पोलिसांत गुन्हा दाखल

महाड । मिलिंद माने
दारूच्या आहारी गेलेल्या एका व्यसनाधीन पतीने जेवण वाढण्याच्या किरकोळ कारणावरून आपल्या पत्नीला लाकडी फाट्याने (दांडक्याने) बेदम मारहाण केल्याची धक्कादायक घटना समोर आली आहे. महाड तालुक्यातील नरवण गावातील भेलोशी कोंड येथे ही घटना घडली असून, याप्रकरणी पीडित पत्नीच्या तक्रारीवरून महाड तालुका पोलीस ठाण्यात आरोपी पतीविरोधात गुन्हा दाखल करण्यात आला आहे.

नेमकं काय घडलं?

पोलीस सूत्रांकडून मिळालेल्या माहितीनुसार, नरवण (भेलोशी कोंड) येथील रहिवासी प्रवीण कृष्णा गोसावी (वय ५४) हा दारूच्या आहारी गेला असून, तो नेहमीच पत्नीला मारहाण करत असे. १६ जून रोजी सायंकाळी ७ वाजण्याच्या सुमारास आरोपी प्रवीण दारू पिऊन घरी आला आणि त्याने पत्नीकडे जेवण मागितले.

त्यावेळी त्याची पत्नी घरातील जमिनीचे (वलय/शेण सारवण्याचे) काम करत होती. त्यामुळे तिने पतीला “तुम्ही स्वतःच्या हाताने जेवण वाढून घ्या,” असे सांगितले. या किरकोळ गोष्टीचा राग मनात धरून आरोपी प्रवीण घराबाहेर गेला आणि तेथून एक लाकडी फाटा घेऊन आला. त्याने काहीही विचार न करता हातातील लाकडी फाट्याने पत्नीच्या दोन्ही हातांवर, डाव्या पायावर आणि कमरेवर बेदम मारहाण करण्यास सुरुवात केली.

जीवे मारण्याची धमकी; गुन्हा दाखल

या मारहाणीत पीडित महिला गंभीर जखमी झाली आहे. मारहाण केल्यानंतरही आरोपीचा राग शांत झाला नाही, त्याने पत्नीला “तुला जीवे ठार मारतो” अशी धमकीही दिली.

याप्रकरणी महाड तालुका पोलीस ठाण्यात आरोपी प्रवीण कृष्णा गोसावी याच्या विरोधात भारतीय न्याय संहिता (BNS) २०२३ च्या कलम ११८(१), ११५(२), ३५२, आणि ३५१(२) अन्वये गुन्हा दाखल करण्यात आला आहे. या घटनेचा पुढील तपास महाड तालुका पोलीस ठाण्याचे पोलीस अंमलदार एल. पी. खाडे करीत आहेत.