कोलाड | विश्वास निकम
महाबळेश्वर–पोलादपूर मार्गावरील अंबेनळी घाटात काही दिवसांपूर्वी एक चारचाकी वाहन खोल दरीत कोसळून भीषण दुर्घटना घडली होती. या अत्यंत कठीण परिस्थितीत ‘सह्याद्री वन्यजीव रक्षणार्थ सामाजिक संस्थेच्या’ (SVRSS) बचाव पथकाने जीवाची बाजी लावत यशस्वी बचाव कार्य राबवले. मात्र, या खडतर ऑपरेशनदरम्यान पथकाचे अनेक महत्त्वाचे आणि महागडे बचाव साहित्य खराब झाले होते.
संस्थेचे झालेले हे नुकसान सहाय्यक पोलीस निरीक्षक (API) आनंद रावडे यांच्या निदर्शनास आले. त्यांनी तात्काळ संवेदनशीलतेने पाऊल उचलत मंगळवार, २३ जून रोजी स्वतःहून ‘सह्याद्री’च्या टीमशी संपर्क साधून त्यांना बोलावून घेतले. संस्थेला पुन्हा उभे राहण्यासाठी आणि नवीन अत्याधुनिक बचाव साहित्य खरेदी करण्यासाठी त्यांनी स्वतःच्या खिशातून मोठी आर्थिक मदत सुपूर्द केली.
प्रशासनातील एक संवेदनशील चेहरा
”आजच्या काळात प्रशासनात कर्तव्य बजावताना अशी सामाजिक बांधिलकी, संवेदनशीलता आणि आपुलकी जपणारे अधिकारी दुर्मिळ पाहायला मिळतात. एपीआय रावडे यांच्या या मदतीमुळे केवळ साहित्याची भरपाई झाली नसून, संकटकाळात लोकांचे प्राण वाचवणाऱ्या आमच्या स्वयंसेवकांचे मनोबल आणि उत्साह द्विगुणित झाला आहे.”
— सह्याद्री वन्यजीव रक्षणार्थ सामाजिक संस्था (SVRSS)
अडचणीच्या काळात धावून येत खाकी वर्दीतील माणुसकीचे दर्शन घडवल्याबद्दल ‘सह्याद्री’ संस्थेच्या वतीने एपीआय आनंद रावडे यांचे मनःपूर्वक आभार मानण्यात आले. त्यांच्या या कौतुकास्पद कामगिरीमुळे इतर शासकीय अधिकारी आणि नागरिकांनाही सामाजिक कार्याची प्रेरणा मिळेल, अशा भावना परिसरातून व्यक्त होत आहेत.