३ ट्रेलरमधून आणली दारू; उरण राज्य उत्पादन शुल्क विभागाची कारवाई
विठ्ठल ममताबादे
उरण : उरण येथे जेएनपीटी परिसरात दीव-दमण येथून परदेशी दारु येणार असल्याची पक्की खबर राज्य उत्पादन शुल्क विभागाचे आयुक्त डॉ. विजय सुर्यवंशी यांना मिळाली होती. आयुक्तांनी आपल्या अधिकाऱ्यांसह उरण येथे विविध ठिकाणी गस्त ठेवली होती. शनिवारी (दि. २३) रात्रीच्या सुमारास जासई उरण येथे ३ संशयीत ट्रेलरची तपासणी केली असता या तीन बाराचाकी ट्रेलरमध्ये दारुचे बॉक्स आढळून आले.
सदर कारवाई राज्य उत्पादन शुल्क विभागाचे आयुक्त डॉ. विजय सुर्यवंशी, सहआयुक्त सुनिल चव्हाण, राज्य उत्पादन शुल्क विभागाचे अतिरिक्त आयुक्त यतिन सावंत, राज्य उत्पादन शुल्क विभाग (ठाणे रेंज) उपायुक्त प्रसाद सुर्वे, राज्य उत्पादन शुल्क (रायगड) अधिक्षक आर. आर. कोले यांच्या मार्गदर्शनाखाली उरणचे दुय्यम निरीक्षक प्रविण एस. माने, सुहास दळवी यांनी ही कारवाई केली.
या तीन ट्रेलरमधून ७६ लाख रुपयांचा ऐवज जप्त केला असून, सिग्नेचर व्हिस्की २२८० बॉक्स, तर मॅकडॉलचे ३७५ बॉक्स एवढा माल जप्त केला आहे. तसेच ३ आरोपींना अटक करण्यात आली आहे.
या गुन्ह्यात हरिश्चंद्र गोरख गायकवाड (पाटोदा-बीड), मोहम्मद वसीर (मकदूमनगर- सुलतानपूर (उ.प्र.), देवीदास तांदळे (आष्टी-बीड) यांना अटक करुन तीन १२ चाकी ट्रेलर आणि ३ कंटेनर्स जप्त करण्यात आले आहेत. सदर दारुचा पुरवठा कोणाकडे जाणार होता त्याचा तपास राज्य उत्पादन शुल्क विभाग करीत आहे अशी माहिती दुय्यम निरीक्षक प्रविण माने यांनी दिली.