नवी मुंबई : व्हॉट्सॲपवरून अनोळखी महिलेसोबत मैत्री करणे कामोठेमध्ये राहणाऱ्या एका व्यावसायिकाला चांगलेच महागात पडले आहे. व्हॉट्सॲपवरून मैत्री झालेल्या या महिलेने ऑनलाइन गोल्ड व वाइन ट्रेडिंग केल्यास मोठा आर्थिक फायदा होईल, असे आमिष दाखवून या व्यावसायिकाला गुंतवणूक करण्यास भाग पाडून त्याच्याकडून एक कोटी ३८ लाख रुपयांची रक्कम उकळल्याचा प्रकार उघडकीस आला आहे. कामोठे पोलिसांनी या प्रकरणातील अज्ञात महिलेविरोधात तसेच, तिच्या इतर सहकाऱ्यांविरोधात फसवणुकीसह आयटी ॲक्टनुसार गुन्हा दाखल करून तपासाला सुरुवात केली आहे.
या प्रकरणात फसवणूक झालेले ५१ वर्षीय थॉमस हे कामोठे येथे राहण्यास असून नोव्हेंबर २०२०मध्ये निकोल लीन नावाच्या महिलेने व्हॉट्सॲपच्या माध्यमातून थॉमस यांच्यासोबत मैत्री केली होती. त्यानंतर या दोघांमध्ये व्हॉट्सॲप चॅटिंगवरून संवाद वाढल्यानंतर निकोल लीन हिने थॉमस यांचा विश्वास संपादन करून त्यांना गोल्ड ट्रेडिंग करण्यास सांगितले. त्यासाठी त्यांना मोबाइलवर मालामो ॲप डाऊनलोड करण्यास सांगितले. सुरुवातीला थॉमस यांनी ५० हजार रुपये गुंतवणूक केल्यानंतर त्यांना ५४ हजार रुपये परत मिळाले. त्यामुळे थॉमस यांनी नोव्हेंबर २०२० ते फेब्रुवारी २०२१या कालावधीत १५ लाख रुपयांचे गोल्ड ट्रेडिंग केले. परंतु, त्यातून थॉमस यांना काहीही परतावा मिळाला नाही. त्यानंतर मार्च २०२१मध्ये निकोल लीन हिने पुन्हा थॉमस यांना संपर्क साधून गोल्ड ट्रेडिंगमध्ये झालेले नुकसान भरून काढण्यासाठी त्यांना वाइन ट्रेडिंग करण्यास सांगितले. त्यात निकोल हिने ५० टक्के नुकसान घेण्याचे आश्वासन देऊन त्यांना वाइन ट्रेडिंग करण्यास भाग पाडले. त्यासाठी निकोल लीन हिने जीआयसी हे ॲप डाऊनलोड करण्यास सांगितले.