अनंत नारंगीकर
उरण : लाखो भाविकांचे श्रध्दास्थान असलेल्या श्री महागणपतीच्या मंदिरात माघी गणेशोत्सवाचे औचित्य साधून मोठ्या उत्साहात मंगळवारी (दि. १३) जन्मोत्सव सोहळा साजरा करण्यात आला. यावेळी हजारो भाविकांनी श्रींच्या दर्शनासाठी मंदिर परिसरात गर्दी केली होती. राष्ट्रीय किर्तनकार हभप उध्दवबुवा जावडेकर पुणे यांचे सुश्राव्य किर्तन, प्रवचन सोहळ्याचे आयोजन तसेच यशस्वी उद्योजक सागर राजाशेठ खारपाटील यांच्या हस्ते सकाळी श्रींच्या अभिषेक सोहळ्याचे आयोजन श्री गणपती देवस्थान चिरनेरच्यावतीने करण्यात आले होते.
गणपती ही ज्ञान देवता म्हणून ओळखली जाते. महाराष्ट्रात गणेशाची अनेक पुरातन जागृत देवस्थाने आहेत. असेच एक पुरातन जागृत देवस्थान रायगड जिल्ह्यातील चिरनेर या ऐतिहासिक गावात आहे. रायगडातील उरण तालुक्यात असणारे चिरनेर हे गाव निसर्ग संपन्नतेची देणगी लाभलेले सुंदर गाव आहे. पूर्वीच्या काळी मुख्य बाजारपेठ असणारे चिरनेर गाव इंग्रज राजसत्ते विरुद्ध लढल्या गेलेल्या १९३० सालच्या जंगल सत्याग्रहाच्या लढ्याने भारतीय स्वातंत्र्य संग्रामाच्या इतिहासात प्रसिद्ध पावले आहे. मात्र, चिरनेरची खरी ओळख आहे ती पुरातन, जागृत अशा महागणपती देवस्थाना मुळे!
चिरनेर गावात असणारे अत्यंत प्राचीन महागणपती देवस्थान आता गणेशभक्तांची पंढरी झाली आहे. महागणपतीच्या दर्शनाला येणाऱ्या भाविकांना आपल्या इच्छापूर्तीचा अनुभव वेळोवेळी येत असल्याने या देवस्थानी नतमस्तक होण्यासाठी भाविकांची नेहमी गर्दी असते. अत्यंत प्राचीन असणाऱ्या या देवस्थानचा जीर्णोद्धार पेशव्यांचे सरदार रामजी महादेव फडके यांनी केला आहे. पाषाणी, गोल घुमटाच्या भव्य मंदिरात महागणपती बाप्पा स्थानापन्न आहेत. मूर्ती पाषाणी, चतुर्भुज शेंदूरचर्चित असून पूर्वाभिमुख आहे. सुमारे सहा फूट उंच व साडेतीन फूट रुंद अशी भव्य असणारी मूर्ती पद्मासनात बसली असून गणरायाच्या हाती खड्ग व पाश आहेत.
नवसाला पावणारा गणपती म्हणून महागणपतीची ख्याती सर्वदूर पसरली असल्याने हजारो गणेशभक्त देवदर्शनासाठी नेहमी आवर्जून येतात. यावर्षी मंगळवारी (दि. १३) माघी गणेशोत्सव आल्याने श्रींच्या जन्मोत्सवाचे औचित्य साधून श्री गणपती देवस्थान चिरनेरच्या वतीने विविध धार्मिक कार्यक्रमांचे आयोजन करण्यात आले होते. तसेच दूरदूर वरुन येणाऱ्या भाविकांसाठी महाप्रसादाचे आयोजन करण्यात आले होते. यावेळी हजारो भाविकांनी, पर्यटकांनी आपल्या लाडक्या श्रींच्या दर्शनासाठी मंदिर परिसरात गर्दी केल्याचे चित्र पहावयास मिळत होते.