पोलादपूर : कोकणातील पोलादपूर जवळील आंबेनळी घाटात पडलेल्या दरडी बाबत मोठी माहिती समोर आली आहे. मंगळवारी रात्री उशिरा ज्या ठिकाणी ही दरड कोसळली त्या घटनास्थळी रस्त्यालाही भेग पडल्याचे दिसून आल्याने रात्री दरड हलविण्याचे काम करण्यात आले नाही. दरड कोसळल्यामुळे दरीच्या बाजूचे सुरक्षा कठडे तुटले आहेत त्यामुळे घाटातील धोका अधिक वाढला आहे.
दरड स्पॉटवरुन महाबळेश्वर व साताऱ्याकडून येणार्‍या सर्व गाड्या माघारी पाठवण्यात आल्या आहेत. दरड कोसलेल्या ठिकाणापासून दूर पाठवून वाहनांना घाटात प्रवेश करता येणार नाही अशी व्यवस्था प्रशासनाकडून तात्काळ करण्यात आली आहे. पोलादपूर बाजूकडूनही येणार्‍या वाहनांना सुरक्षिततेच्या दृष्टीने परत पाठवून घाटातली वाहतूक तात्काळ थांबविण्यात आली आहे.
घटनास्थळी पोलादपूर तहसीलदार श्री. घोरपडे, महाड डीवायएसपी शंकर काळे, सहाय्यक पोलीस निरीक्षक श्री.म्हसकर, बांधकाम अभियंता आणि कर्मचारी आपत्कालीन साहित्यसह उपस्थित होते. बुधवारी सकाळी दरड हटविणे सुरू करण्याचा निर्णय प्रशासनाकडून घेण्यात आला आहे. अजूनही डोंगरावरून रस्त्यावर दगड कोसळत आहेत. महाबळेश्वर पोलीस निरीक्षक श्री.भागवत यांचे सोबत स्थानिक पातळीवर नियंत्रण करण्याबाबत पोलीस प्रशासनाची चर्चा सुरू आहे.