अनंत नारंगीकर
उरण : धूतूम ग्रामपंचायत हद्दीतील अंडर पास (भुयारी) रस्त्यावर रविवारी (दि. १७) दुपारी ३.३० वा.च्या सुमारास मालवाहू कंटेनर पलटी झाल्याची घटना घडली आहे. सदर अपघातात मोटारसायकल चालक थोडक्यात बचावला आहे.
जेएनपीए बंदर प्रशासनाने एनएच ४ बीच्या माध्यमातून जेएनपीए बंदर ते पळस्पे फाटा या महामार्गाची उभारणी केली आहे. या महामार्गावरील चिर्ले व धुतूम गाव परिसरातील नागरिकांना, प्रवासी वाहनांना सुखकर प्रवास होण्यासाठी एनएच ४ बी ने चिर्ले व धुतूम गावाजवळ अंडर पास (भुयारी) रस्त्याची उभारणी केली आहे. परंतु, सदर अंडर पास ( भुयारी) रस्ता हा प्रवाशी वाहतूकीसाठी असताना या रस्त्यावरून रात्री अपरात्री अवजड वाहने प्रवास करत आहेत. त्यामुळे अपघाताची संख्या बळावली आहे.
त्यातच मागील महिन्यात चिर्ले, धुतूम गावाजवळील अंडर पास (भुयारी) रस्त्यावर मालवाहू कंटेनर फोर व्हीलर गाडीवर पलटी होण्याची घटना घडली होती. सुदैवानी सदर अपघातात फोर व्हीलर गाडीचे नुकसान झाले आणि चालक थोडक्यात बचावला होता. या अपघातानंतर धुतूम गावाजवळील अंडर पास (भुयारी) रस्त्यावर रविवारी (दि. १७) मालवाहू कंटेनर पलटी होण्याची घटना घडली आहे. या अपघातात सुदैवाने मोटारसायकल चालक थोडक्यात बचावला आहे.
एनएच ४बी ने चिर्ले व धुतूम गाव परिसरातील नागरिकांचा, दैनंदिन नोकरदार प्रवासी नागरिकांचा प्रवास सुखकर होण्यासाठी सदर गावाजवळ अंडर पास (भुयारी) मार्ग बनविला आहे. परंतु रहिवाशांच्या रहदारीच्या रस्त्यावरील अंडर पास (भुयारी) रस्त्यावरून रात्री अपरात्री अवजड वाहनांची रेलचेल असते. त्याचा त्रास हा नागरिक, लहान वाहन चालक यांना सहन करावा लागत आहे. तरी नागरिकांच्या रहदारीच्या भुयारी मार्गावर अवजड वाहनांना बंदी घालण्यात यावी नाहीतर होणाऱ्या अपघातात निष्पाप लोकांचा जीव जाणार असेल तर धुतूम ग्रामपंचायत सदर भुयारी मार्गावरील अवजड वाहनांच्या बंदीसाठी आंदोलन उभारणार असल्याचा इशारा धुतूम ग्रामपंचायतीच्या सरपंच सुचिता प्रेमनाथ ठाकूर यांनी दिला आहे.