पुणे : हिंदूंच्या सणांची माहिती विकृत करणे आणि हिंदूंच्या भावना दुखावल्याप्रकरणी मुख्यमंत्री एकनाथ शिंदे यांना नुकतीच कायदेशीर नोटीस बजावण्यात आली आहे. गुडीपाडवानिमित्त एका कार्यक्रमात एकनाथ शिंदे यांनी खोटे ऐतिहासिक दावे केल्याच्या आरोपाखाली त्यांना कायदेशीर नोटीस पाठवण्यात आली.
गुढीपाडवा म्हणजे रावणावर प्रभू रामाच्या विजयाचा उत्सव आहे, असे शिंदे यांनी नुकतेच गुढीपाडव्याच्या कार्यक्रमात केलेल्या विधानामुळे पुण्यातील विधी महाविद्यालयातील सौरभ ठाकरे- पाटील आणि तेजस बैस या दोन विद्यार्थ्यांनी वकील असीम सरोदे यांच्यामार्फत त्यांना नोटीस पाठवली. उत्तरदायित्व आणि जबाबदाऱ्यांसह मुख्यमंत्रिपद भूषवूनही तुमच्या वक्तव्यातून तुम्हाला जबाबदारीची जाणीव नसल्याचे दिसून येते. तुम्ही अनेकदा निराधार, खोटी आणि दिशाभूल करणारी विधाने करता, असे नोटीसमध्ये म्हटले आहे.
‘गुढीपाडव्याच्या दिवशी म्हणजे ९ एप्रिल रोजी ठाण्यातील एका कार्यक्रमात तुम्ही सांगितले होते की, रावणावर प्रभू रामाने मिळवलेल्या विजयाचे प्रतीक म्हणून आम्ही गुढीपाडवा साजरा करतो. हे विधान हास्यास्पद आहे, कारण शाळकरी मुलांनाही माहित आहे की आपण रावणावर प्रभू रामाच्या विजयाचे प्रतीक म्हणून दसरा साजरा करतो. गुढीपाडवा असल्याचा दावा करून तुम्ही हिंदूंच्या भावना दुखावल्या आहेत. एकनाथ शिंदे हिंदुत्वनिष्ठ असल्याचा दावा करतात आणि तरीही त्यांना हिंदू संस्कृती आणि सणांची प्राथमिक माहिती नाही, हे अत्यंत दुर्दैवी आहे.
गेल्या वर्षी दसरा मेळाव्यात मुख्यमंत्री शिंदे यांनी आपल्या भाषणात महादाजी शिंदे आणि दत्ताजी शिंदे यांनी छत्रपती शिवरायांशी लढून प्राणांची आहुती दिली. पण शरणागती पत्करली नाही, असे म्हटले होते. महादाजी शिंदे आणि दत्ताजी शिंदे यांचा जन्म शिवाजी महाराजांच्या मृत्यूनंतर अनेक दशकांनंतर झाला होता, हे सर्वांना माहिती आहे. दत्ताजी शिंदे यांचा जन्म १७२३ मध्ये तर महादाजी शिंदे यांचा जन्म १७३० मध्ये झाला. तरीही तुम्ही ऐतिहासिक तथ्यांचा विपर्यास केला. तुमच्या खोट्या आणि दिशाभूल करणाऱ्या वक्तव्यांबद्दल तुम्ही सात दिवसांच्या आत जाहीर माफी मागावी, अन्यथा कायदेशीर कारवाईला सामोरे जावे लागेल, असा इशारा मुख्यमंत्र्यांना देण्यात आला.