रायगडच्याकौस्तुभ म्हात्रेची महाराष्ट्राच्या २३ वर्षांखालील क्रिकेट संघात निवड; पेण तालुक्यासह जिल्ह्यात आनंदाचे वातावरण

क्रीडा प्रतिनिधी

रायगड जिल्हा क्रिकेट असोसिएशन आणि पेण स्पोर्ट्स असोसिएशनचा गुणवान युवा वेगवान गोलंदाज कौस्तुभ हेमंत म्हात्रे याची महाराष्ट्राच्या २३ वर्षांखालील (अंडर-२३) मुलांच्या क्रिकेट संघात निवड झाली आहे. त्याच्या या उल्लेखनीय कामगिरीमुळे संपूर्ण रायगड जिल्ह्यातून कौतुकाचा वर्षाव होत आहे.

एमसीए लीग स्पर्धेतील उत्कृष्ट कामगिरी

कौस्तुभ म्हात्रे याने रायगड जिल्हा क्रिकेट असोसिएशनच्या वतीने खेळताना 'एमसीए इन्व्हिटेशन लीग' स्पर्धेत अत्यंत दर्जेदार आणि प्रभावी गोलंदाजीचे प्रदर्शन केले होते. त्याच्या याच सातत्यपूर्ण आणि उत्कृष्ट खेळाची दखल घेत त्याची महाराष्ट्र संघासाठी निवड करण्यात आली आहे.

सामान्य कुटुंबातील प्रतिभावंत खेळाडू

पेण तालुक्यातील निगडी गावातील एका सामान्य कुटुंबातील कौस्तुभने आपल्या मेहनतीच्या बळावर हे यश संपादन केले आहे. त्याच्या या निवडीमुळे पेण तालुक्यासह संपूर्ण रायगड जिल्ह्यातील क्रिकेट वर्तुळात आणि क्रीडाप्रेमींमध्ये आनंदाचे व उत्साहाचे वातावरण निर्माण झाले आहे. याआधी रोशनी पारधी यांच्यापाठोपाठ आता कौस्तुभ म्हात्रे यांची राज्य आणि राष्ट्रीय स्तरावरील क्रिकेटसाठी निवड झाल्याने जिल्ह्यातील उदयोगवान तरुण-तरुणींना मोठी प्रेरणा मिळणार आहे.

कौस्तुभच्या या यशाबद्दल रायगड जिल्हा क्रिकेट असोसिएशनचे अध्यक्ष अनिरुद्ध पाटील, सचिव प्रदीप नाईक, पेण स्पोर्ट्स असोसिएशनचे अध्यक्ष अरुण शिंदे यांच्यासह जिल्हा क्रिकेट असोसिएशनच्या सर्व पदाधिकारी व सदस्यांनी त्याचे हार्दिक अभिनंदन केले आहे.

भविष्यात रायगड जिल्ह्यातून जास्तीत जास्त उच्च दर्जाचे क्रिकेटपटू घडवून त्यांना महाराष्ट्र आणि भारतीय संघापर्यंत पोहोचवण्यासाठी जिल्हा क्रिकेट असोसिएशन कटिबद्ध असून यासाठी सातत्याने प्रयत्न केले जात आहेत, असा विश्वास जिल्हाध्यक्ष अनिरुद्ध पाटील यांनी व्यक्त केला आहे.