घनःश्याम कडू
उरण : उरण परिसरातील समुद्र किनारी डिझेल व तेलाची तस्करी खुलेआम सुरू आहे. शासकीय यंत्रणेकडून कारवाई होताना दिसत नाही. तरी या माफियांवर कारवाई करण्याची मागणी जोर धरू लागली आहे. जेएनपीटी बंदरात येणार्‍या परदेशी जहाजातील कर्मचार्‍यांशी संधान बांधून समुद्रकिनार्‍यापासून दूर काही नॉटिकल मैल अंतरावर उभ्या राहणार्‍या जहाजातील डिझेल छोट्या बोटीत उतरवून खाडी मार्गाने तस्करी करण्याचे काम मागील काही वर्षांपासून जोरात सुरु आहे. पोलीस, तटरक्षक दल यांना या तस्करीची माहिती असून, त्यांच्या आशीर्वादानेच व्यवसाय राजरोसपणे सुरु आहेत, असा स्थानिकांचा आरोप आहे. परदेशी जहाजातून जवळपास 30 रुपये लीटरने मिळणारे हे डिझेल बाजारपेठेत जादा दराने विक्री करून महसूल बुडवण्याचे काम हे तस्कर करतात, असे म्हटले जाते.
सध्या डिझेलच्या वाढत्या किंमती पाहता, काळ्या बाजारातून गाडी व्यावसायिक डिझेल घेताना दिसत आहेत. पोलीस ठाण्यांचे सागरी मार्गाकडे दुर्लक्ष असल्याचेच दिसून येत आहे. कारण सर्रास खाडीच्या परिसरात डिझेलची तस्करी सुरू आहे. गेल्या 15 दिवसांत याचा ओघ वाढल्याचे दिसत आहे. हे समुद्र चाचे बाहेरून येणार्‍या बार्जेसच्या चालकांकडून हजारो लिटर डिझेल घेत असतात आणि हे डिझेल साठवून ठेवतात. डिझेलच्या किंमती वाढल्याने मोठ्या प्रमाणात या डिझेलला मागणी आहे. उरण, पनवेल, वडखळ, नागोठणे या भागातील ट्रान्सपोर्टचा धंदा करणरे या समुद्र चाच्यांशी संपर्क करून, डिझेल खरेदी करत असतात.
डिझेलच्या किंमती वाढल्याने समुद्र चाच्यांचा डिझेल तस्करीचा धंदा जोरात सुरु आहे. परंतु, वेळीच समुद्र चाच्यांवर बंधने घातली नाहीत, तर या मार्गाचा वापर अतिरेकी कारवाई करण्यासाठी भविष्यात झाल्यास नवल वाटू नये. पोलीस खात्याचे सपशेल या बाबीकडे दुर्लक्ष आहे. असेच म्हणावे लागेल. पोलीस खात्याला 26/11 च्या हल्ल्याचा विसर पडल्याचे चित्र दिसत आहे. 26/11 च्या हल्ल्यासाठी उरण, (करंजा) जेट्टीचा वापर केल्याचे त्यावेळी उघड झाले होते. तरी या माफियांवर ठोस कारवाई करण्याची मागणी जोर धरू लागली आहे.