नाशिक : महाराष्ट्र नवनिर्माण विद्यार्थी सेनेचे अध्यक्ष अमित ठाकरे यांचा ताफा सिन्नरच्या गोंदे टोल नाक्यावर अडवल्याने काल समृद्धी महामार्गावरील गोंदे टोलनाक्याची मनसेच्या कार्यकर्ते पदाधिकाऱ्यांनी मध्यरात्रीच्या सुमारास तोडफोड केली होती. हे टोल राडा प्रकरण मनसेच्या पदाधिकाऱ्यांना चांगलेच भोवले असून त्यांच्यावर गुन्हा दाखल करण्यात आला असून बारा ते पंधरा संशयितांपैकी आठ संशयित पदाधिकाऱ्यांना अटक करण्यात आली आहे.
वावी पोलीस आणि स्थानिक गुन्हे शाखा यांच्या संयुक्त पथकाने ही कारवाई केली आहे. रात्री आठ संशयितांना पोलिसांनी ताब्यात घेतले असून अद्याप ५ ते ७ संशयित फरार असल्याची माहिती मिळाली आहे. टोलनाका तोडफोड प्रकरणी १२ ते १५ संशयित व्यक्तींवर गुन्हा दाखल करण्यात आला आहे. मनसे नेते अमित ठाकरे यांना टोलनाक्यावरील कर्मचाऱ्यांनी अपमानास्पद वागणूक दिल्याचा आरोप करत मनसे कार्यकर्त्यांनी टोलनाका फोडला होता.
सिन्नरच्या वावी पोलीस ठाण्यात समृद्धी टोल प्रशासनाच्या वतीने तक्रार देण्यात आली होती या तक्रारीवरून १२ ते १५ अज्ञात व्यक्तींविरोधात गुन्हा दाखल करण्यात आला आहे. समृद्धी महामार्गावरील टोलनाकाच्या तोडफोडीमध्ये जवळपास पाच लाखांचं नुकसान झाल्याचं तक्रारीत नमूद करण्यात आले आहे. मनसेने मागच्या काळात टोलनाक्याविरोधात भूमिका घेतली होती. त्यावेळी देखील टोलनाके फोडण्यात आले होते. त्यानंतर मनसेने नाशिक मधील टोलनाका फोडल्याने मनसेच्या टोलनाकाविरोधी आंदोलनाला उजाळा मिळाला आहे.
या संशयितांना अटक करण्यात आली आहे…
१) स्वप्निल संजय पाटोळे वय २८ वर्षे धंदा नोकरी राहणार अभियंता नगर कामटवाडी शिवार नाशिक
२) ललित नरेश वाघ वय २८ वर्षे धंदा -नोकरी राहणार नाशिक मर्चंट बँक पाठीमागे पवन नगर सिडको नाशिक
३) शुभम सिद्धार्थ थोरात वय २७ वर्षे धंदा मोबाईल विक्री दुकान राहणार सिडको दत्त चौक मार्केट मागे नाशिक
४) मेघराज शाम नवले वय २९ वर्षे धंदा फ्लेक्स प्रिंटिंग राहणार पाथर्डी फाटा जिजाई सदन नवले नगर, नाशिक
५) शशिकांत शालिग्राम चौधरी वय ३५ वर्षे धंदा लॉन्ड्री राहणार कलानगर जेलरोड आनंद विजय संकुल नाशिक
६) बाजीराव बाळासाहेब मते वय २४ वर्षे धंदा शेतकरी राहणार देवळाली गाव शिवाजी महाराज पुतळा जवळ मते नगर नाशिक रोड
७) प्रतीक माधव राजगुरू वय २३ वर्षे धंदा मशीन ऑपरेटर फ्लेक्स प्रिंटिंग राहणार सावता नगर सिडको मीनाताई शॉपिंग सेंटर नाशिक
८) शैलेश नारायण शेलार वय ३१ वर्षे धंदा उसाची रसवंती राहणार खेरवाडी तालुका निफाड जिल्हा नाशिक