वाकी बु!! ता. महाड, जि. रायगड येथील आई श्री सोमजाई देवी पालखी उत्सव सोहळा शुक्रवार, दि. १४ मार्च २०२५ ते शनिवार दि. २२ मार्च २०२५ पर्यंत साजरा करण्यात येणार आहे.
कोकणात शिमगा उत्सवाला खूप महत्त्व आहे. कोकणात शिमगा उत्सवाला सुरुवात झाली असून पालखीच्या एक दिवस अगोदर होळी पेटवली जाते. भक्तीभावाने गावकरी एकत्र येऊन होळी आनंदात साजरी करतात. होळी झाली की दुसऱ्या दिवशी पालखीला सुरुवात होते. बारा वाडीतील ग्रामदैवत नवसाला पावणारी श्री आई सोमजाई देवीचा पालखी उत्सव सोहळा भक्तीभावाने, आनंदाने, एकजुटीने एकत्र साजरा करतात. ह्यात कोणताही भेदभाव नसतो. वाडीतील मुले आई सोमजाई देवीचे चित्र असलेला टी-शर्टचा पेहराव करतात. पालखी सोहळ्यानिमित्त विविध कार्यक्रमाचे आयोजन करण्यात येते. पालखी मिरवणूक प्रत्येक वाडीत घरोघरी फिरते. प्रत्येक वाडीत पालखी आल्यावर अंगणात रांगोळी, दीप, पताके, तोरण, फटाके अशी विविध प्रकारे सजावट केली जाते.
रुढी, परंपरेनुसार भाविक देवीचे दर्शन घेऊन आईची ओटी भरतात, नवस फेडतात, मिरवणूक व वस्तीच्या दिवशी गजर, भजन, कीर्तन, जागरण असे विविध कार्यक्रम समस्त गावकरी आनंदाने साजरे करतात. पालखी मिरवणूक श्री देवी सोमजाई देवस्थानचे अध्यक्ष, विश्वस्त, ग्रामस्थ यांच्या उपस्थितीत सुरु होते. पालखी उत्सवात अनेक मान्यवर व मुंबईचे चाकरमानी सहभागी होतात. सर्व भक्तांनी पालखी उत्सव सोहळ्यात सहभागी होऊन दर्शन, कृपाशीर्वाद तसेच प्रसादाचा लाभ घ्यावा असे आवाहन श्री देवी सोमजाई देवस्थानचे अध्यक्ष, पदाधिकारी, विश्वस्त, समस्त ग्रामस्थांनी केले आहे.
श्री सोमजाई देवी ही स्वयंभू व पुरातन जागृत देवस्थान आहे. देवीचा महिमा आपल्या सर्व भक्तांना ज्ञात आहे. ह्या मुर्ती पाषाणातील असून ह्यात आई सोमजाई, भैरी, जोगेश्वरी, जननी, पांगारकरीण, काळकाई, नामदाईकरीण अशा इतिहास काळातील प्राचीन मुर्ती आहेत. आपण आपल्या सर्व कुटुंब व मित्र परिवार सह ह्या सोहळ्यामध्ये सहभागी होऊन दर्शनाचा लाभ घ्यावा असे आवाहन देवस्थान ट्रस्टच्या वतीने करण्यात आले आहे.
दैनंदिक कार्यक्रमाचे निमंत्रण रूपरेषा पुढीलप्रमाणे :
शुक्रवार दिनांक १४/०३/ २०२५ दुपारी ३ ते ४ वाजता पालखी सजावट गादीवर नंतर पालखी सोमजाई मंदिराला भेट व प्रदक्षिणा, त्यानंतर शेवते गावाकडे प्रस्थान. रात्री गावठाण येथे वस्ती.
शनिवार दि. १५/०३/२०२५ रोजी पालखी मिरवणूक गावठाण रात्री नानेमाची येथे वस्ती. ह्याचप्रमाणे दर दिवशी प्रत्येक गावात (वाडीत) पालखी मिरवणूक व वस्ती. नानेमाची, नानेमाची आवाड, शेवते, आंब्याचा माळ, खडकवाडी, रोहिदास वाडी, शेंदूरमळई, नारायण वाडी, नाद्रुक वाडी, पेडामकरवाडी, शिवाजीनगर अशा प्रत्येक गावोगावी पालखी मिरवणूक फिरते व वस्तीला असते. रस्त्यामध्ये येणाऱ्या भाविकांना दर्शन, पूजाअर्चा, प्रसादाचा लाभ दिला जातो.
शनिवार दि. २२/०३/२५ रोजी सकाळी ८ ते १० वा. देवीच्या गादीवर पालखी विसर्जन करून सोहळा संपन्न केला जातो.
या पालखीला सर्व विश्वस्त व ग्रामस्थ उपस्थित राहतात. संजय गंगाराम कदम (अध्यक्ष ), प्रकाश चंद्र दरेकर (उपाध्यक्ष), श्रीरंग भागोजी भोसले (सचिव), अमोल भाऊ जाधव (खजिनदार), विश्वस्त मोहन म्हामुणकर, प्रदीप म्हामुणकर, प्रभाकर कदम, दीपक कदम, गणपत सालेकर, सदाशिव मोरे, रोहिदास जाधव, बबन मोरे, सुरेश म्हामुणकर व समस्त ग्रामस्थ मंडळी ह्यांचे सहकार्य लाभते. आई सोमजाई देवीचा उदो उदो अशा जल्लोषाने पालखी सोहळा मोठ्या उत्साहात पार पडतो.