स्नेहल जगतापांची भाजपाऐवजी राष्ट्रवादीला पसंती!

शिवसेना उद्धव बाळासाहेब ठाकरे गटाला धक्का?, उद्या सुतारवाडीमध्ये अंतिम निर्णय

मिलिंद माने
महाड : १९४ महाड विधानसभा मतदारसंघातून निवडणूक लढवलेल्या शिवसेना उद्धव बाळासाहेब ठाकरे पक्षाच्या स्नेहल माणिकराव जगताप यांनी शिवसेना उद्धव बाळासाहेब ठाकरे पक्षाला अखेरचा रामराम करीत पुन्हा राष्ट्रवादी काँग्रेसला पसंती दिली असून राष्ट्रवादी काँग्रेस अजित पवार गटामध्ये त्या प्रवेश करणार असून राष्ट्रवादी पुन्हा या राष्ट्रवादी काँग्रेसच्या गीताप्रमाणे त्या आपल्या नवीन अध्यायाला सुरुवात करणार असून कोकणात पुन्हा राष्ट्रवादी काँग्रेस पक्ष विशेषत: ३२ रायगड लोकसभा मतदारसंघात पुन्हा नव्याने उभारी घेणार असल्याचे संकेत मिळत असून जगतापांच्या व तटकरेंच्या माध्यमातून नवीन समीकरण उदयाला येण्याची शक्यता नाकारता येत नाही. याबाबतची अंतिम बोलणी राष्ट्रवादी काँग्रेसचे ३२ रायगड लोकसभा मतदारसंघाचे खासदार सुनील तटकरे यांच्या सुतारवाडी निवासस्थानी होणार आहेत.

रायगड जिल्ह्यातील १९४ महाड विधानसभा मतदारसंघातील निवडणुक ही मोठ्या प्रमाणावर रंगतदार झाली होती. विद्यमान मंत्री गोगावले यांचा पराभव होण्याची चिन्हे असताना अचानक माणगाव तालुक्यातून गोगावलेंना मिळालेल्या यशामुळे शिवसेना उद्धव बाळासाहेब ठाकरे पक्षाच्या स्नेहल माणिकराव जगताप यांचा २६,२१० मतांनी पराभव झाला. पराभव झाल्यानंतर स्नेहल माणिकराव जगताप या नाराज झाल्या होत्या. त्यांची नाराजी मातोश्रीवरून दूर करण्याचा प्रयत्न देखील झाला. मात्र, त्यामध्ये शिवसेनेच्या नेत्यांना यश आले नाही. त्यातच दक्षिण रायगड जिल्हाप्रमुख पदावरील नियुक्तीमुळे देखील जगताप कुटुंब नाराज होते. अखेर त्यांनी भाजपाचा पर्याय शोधण्याचा प्रयत्न केला. मात्र भाजपाच्या मुंबईतील वरिष्ठ नेत्यांनी स्नेहल जगताप यांच्या प्रवेशाकडे चालढकलपणा केल्याचे बोलले जात आहे. त्यामुळेच दोन महिन्याच्या कालावधीमध्ये भाजपाकडून त्यांना कोणतेही ठोस आश्वासन न मिळाल्याने अखेर जगताप कुटुंब पुन्हा काही काळ शिवसेना उद्धव बाळासाहेब ठाकरे पक्षात थांबले.

तटकरेंनी संधी साधली!

३२ रायगड लोकसभा मतदारसंघातून निवडणूक लढवीत असताना विद्यमान खासदार व राष्ट्रवादी काँग्रेस अजित पवार गटाचे विद्यमान प्रदेशाध्यक्ष सुनील तटकरे यांनी स्नेहल जगताप यांचा भाजपात प्रवेश होत नसल्याची संधी साधून जगताप कुटुंबियांना आपलेसे करण्यात यश आले व पुन्हा आपल्या पक्षात प्रवेश देण्याचे निश्चित केले आहे.

घड्याळ तेच वेळ नवी!

राष्ट्रवादी काँग्रेस पक्ष स्थापन झाल्यानंतर कोकणातून पहिल्यांदाच माजी आमदार कै. माणिकराव जगताप यांनी शरदचंद्र पवार यांच्या राहण्याचा निर्णय घेतला. मात्र कालांतराने त्यांचे विद्यमान खासदार सुनील तटकरे यांच्याशी न जमल्याने त्यांनी पुन्हा काँग्रेसवासी होण्याचा निर्णय घेतला. त्यानंतर सलग तीन निवडणुकांमध्ये माणिकराव जगताप यांचा पराभव झाला. त्यानंतर त्यांची कन्या व महाडच्या माजी नगराध्यक्ष स्नेहल माणिकराव जगताप यांनी काँग्रेसमधून शिवसेना उद्धव बाळासाहेब ठाकरे पक्षात निवडणुकीच्या काळात प्रवेश केला व विधानसभा निवडणूक लढवली. मात्र विधानसभा निवडणुकीत स्नेहल माणिकराव जगताप यांना ९१,२३२ तर भरत गोगावले यांना १,१७,४४२ मते मिळाली. एकूण मतदान २,१३,४४७ झाले. त्यापैकी वैध मतदान २,१२,४३६ झाले या निवडणुकीत २६,२१० मतांनी गोगावले यांचा विजय झाला व त्यांना मंत्रिपदाची संधी प्राप्त झाली. मात्र मंत्रीपद प्राप्त होऊन देखील रायगडचे पालकमंत्री पद न मिळाल्याने गोगावलेंसह शिंदे गटातील आमदार व राष्ट्रवादी काँग्रेस अजित पवार गट यांच्यात मागील दोन महिन्यापासून चालू असलेले शाब्दिक युद्ध व रस्त्यावरील आंदोलन पाहता स्नेहल जगताप यांच्या राष्ट्रवादी काँग्रेस अजित पवार गटातील पक्षप्रवेशामुळे १९४ महाड विधानसभा मतदारसंघात पुन्हा शाब्दिक व रस्त्यावरील वादविवादाचे प्रसंग मोठ्या प्रमाणावर नजीकच्या काळात पाहण्यास मिळणार आहेत.

जगतापांचा प्रवेश व तटकरेंच्या मतांची गोळा बेरीज!

स्नेहल माणिकराव जगताप यांचा राष्ट्रवादी काँग्रेस अजित पवार पक्षात प्रवेश झाल्यानंतर तटकरेंना रायगड लोकसभा मतदारसंघातील १९४ महाड विधानसभा मतदारसंघात मिळालेले कमी मताधिक्य पाहता स्नेहल जगताप यांच्या विधानसभेतील ९१,२३२ मतांच्या आकडेवारीकडे पाहता विद्यमान खासदार सुनील तटकरे यांनी पुढील संभाव्य लोकसभा निवडणुकीसाठी मतांची गोळा बेरीज पुन्हा केल्याची चर्चा जगतापांच्या पक्षप्रवेशाच्या निमित्ताने पुन्हा चर्चिली जाऊ लागली आहे.

महामंडळ व राजकीय ताकद मिळणार!

राष्ट्रवादी काँग्रेस अजित पवार गटात प्रवेश केल्यानंतर स्नेहल माणिकराव जगताप यांना विद्यमान सरकारमध्ये महामंडळ व येणाऱ्या स्थानिक स्वराज्य संस्थांच्या निवडणुकीमधील महाड नगरपरिषद व जिल्हा परिषद पंचायत समिती व ग्रामपंचायतच्या निवडणुकीत राजकीय ताकद मिळणार असल्याची चर्चा माणिकराव जगताप यांच्या गटातील कार्यकर्त्यांमध्ये चर्चिली जाऊ लागली आहे.

सुतारवाडीत उद्या अंतिम निर्णय होणार!

राष्ट्रवादी काँग्रेस अजित पवार गटाचे ३२ रायगड लोकसभा मतदारसंघाचे विद्यमान खासदार व प्रदेशाध्यक्ष यांच्या सुतारवाडी येथील निवासस्थानी व पक्ष कार्यालयात याबाबत उद्या सकाळी ११ वाजता अंतिम निर्णय होणार असून त्यानंतर राष्ट्रवादी काँग्रेस पक्षांमधील स्नेहल जगताप यांचा पक्षप्रवेश सोहळा कुठे होणार याबाबत चर्चा होणार आहे.